Walkout sa UP Visayas. Nagmartsa ang kapin 600 ka estudyante sa UP Visayas sa kampus niini sa Miag-ao, Iloilo niadtong Nobyembre 15 aron ipadayag ang ilang mga reklamo ug pangayo sa administrasyon sa unibersidad. Singgit sa mga grupo, organisasyon, ug konseho nga nagmartsa: “Do better UPV!” Giatol ang protesta sa pagdumdum sa National Students’ Day nga ginaselebrar kada Nobyembre 17.
Ika-11 nga tuig sa Superbagyong Yolanda. Nagmartsa padulong sa Mendiola ang mga progresibong grupo ug mga nakaluwas sa kalamidad nga gipangulohan sa People Surge aron dumdumon ang ika-11 anibersaryo sa Superbagyong Yolanda niadtong Nobyembre 8. Nanawagan ang grupo og hustisya alang sa mga namatay ug naapektuhan sa Yolanda niadtong Nobyembre 2013 ilalum sa rehimeng Aquino II. Sa laing bahin, aduna usay protesta sa Marikina City niadtong Nobyembre 12 aron dumdumon ang ika-4 nga anibersaryo sa bagyong Ulysses.
Baktas-ampo sa Quezon. Gatusan ka katawhan sa Quezon ang misalmot sa “Baktas-Ampo alang sa Kalikasan, Hustisya ug Kamatuuran” nga gipahigayon niadtong Nobyembre 8 sa Lucena City. Misalmot sa aktibidad ang mga tawong-simbahan, mga grupong nanalipud sa kinaiyahan, ug uban pa aron manawagan nga undangon ang pagkwari ug magun-ubong mga proyekto sa prubinsya. Miadto ang mga grupo sa kapitolyo aron itunol ang usa ka petisyon.
Protesta batok sa climate change ug gyera. Nakighiusa ang mga maki-kinaiyahan ug demokratikong organisasyong Pilipino sa Global Day of Action Against Climate and War nga gipahigayon niadtong Nobyembre 16. Nagprotesta sila atubangan sa embahada sa US sa Maynila diin ilang gitumbok ang US isip numero unong hinungdan sa climate change ug mga gyera sa tibuok kalibutan. Ang protesta kadungan sa pag-abli sa COP29 sa Baku, Azerbaijan.
