Madinalag-on ang CBA sa Daiwa Seiko Philippines. Isa ka adlaw pagkatapos ianunsyo ang plano nga welga sang mga mamumugon sang Daiwa Seiko Philippine Corporation, gilayon nakighisugot ang kapitalista sang kumpaniya sa Malayang Unyon ng DSPC-OLALIA-KMU sa isa ka bag-o nga collective bargaining agreement (CBA) nga una nga ginpunggan kag ginbarat sang kumpaniya. Nagboto pabor sa welga ang unyon sadtong Nobyembre 12 kag ginpirmahan ang CBA sadtong Nobyembre 13.
Bag-o nga CBA sa Philippine Span Asia Carrier Corp. Pagkatapos sang isa ka tuig, napadaug sang Samahan ng Manggagawa sa PSACC-NAFLU-KMU ang bag-o nga CBA sadtong Oktobre. Nakakuha ang unyon sang dugang-sweldo, dugang nga mga bayad pareho sang longevity pay kag iban pa nga mga benepisyo. Sa pihak sang lain-lain nga pagtinguha sang maneydsment nga idiskaril ang negosasyon,nagiit sang mga mamumugon ang ila kinamatarung.
Protesta sa paglapas sang CBA sa PhilFoods. Nagprotesta sadtong Nobyembre 11 ang mga mamumugon sa Philfoods Fresh Baked Product Inc sa Laguna International Industrial Park sa Biñan, Laguna. Nagapanawagan ang unyon sa kapitalista nga tumanon ang nakasugtan nga probisyon sa subong nga CBA lakip ang paghatag sang alawans sa pagkaon kag retroactivity.
Pakig-away sang unyon sa Golden Zone Garments. Ginbatikos sang mga mamumugon sang Golden Zone Garments and Accessories Inc (GZGAI) ang DOLE sa pagpamalibad sini nga kilalahon ang ila unyon nga Nagkakaisang Manggagawa ng GZGAI bilang sole and exclusive bargaining agent (SEBA) sa kumpaniya. Nakuha sang unyon ang mayoriya nga boto sa pagpasugot sang mga mamumugon para mangin SEBA, apang, ginaduso sang DOLE ang proseso nga “validation” sa sulod sang pabrika bisan pa kumpleto na ang dokumento nga ginpasa sang unyon.
Protesta batuk sa pagpanumpo sa mga mamumugon. Nagprotesta ang mga grupo sa pangabudlay sa Quezon City sadtong Nobyembre 16 agud handurawon ang International Day Against Trade Union Repression. Nagsindi sila sang kandila bilang panawagan sang hustisya sa mga mamumugon kag unyonista nga ginpatay sang mga pwersa sang estado sang nagligad nga tuig. Nagapabilin nga isa sa pinakamakatalagam nga pungsod para sa mga mamumugon ang Pilipinas sa tuig 2024.
