Ha ngaran han mga rebolusyunaryo nga pwersa ngan katawhan han Eastern Visayas, ginpapaabot namon an pinakamapaso nga pagbati ha Partido Komunista ng Pilipinas (PKP) ha ika-57 nga anibersaryo han utro nga pagkatukod hini ha giya han Marxismo-Leninismo-Maoismo. Ibandera naton yana nga adlaw an bulawanon hini nga kasaysayan han pagpapasulong han rebolusyunaryo nga pakigbisog para ha pagtatalwas han tinalumpigos nga katawhan ha Pilipinas ngan ha bug-os nga kalibutan, kadungan han utro nga pagpapadig-on han aton panindugan nga ipasulong an pakigbisog tubtub ha hul-os nga kadaugan.
Tagan naton hin pinakahitaas nga pagpasidungog an mga martir han rebolusyon Pilipino. Tagan naton hin nalalain nga pagkilala hi Kasamang Jose Maria Sison, dakila nga komunista nga magturutdo, ngan an ngatanan nga martir han rebolusyunaryo nga kagiusan ha Eastern Visayas labina an mga namatay ha nakalabay nga tuig. Bug-os nga panahon nga hihinumdumon an mabayanihon nira nga kinabuhi ngan paghalad han kalugaringon para ha pagtatalwas han katawhan.
Hul-os nga ginkikilala ngan ginsasaludaran han mga rebolusyunaryo nga pwersa ngan katawhan ha Eastern Visayas (EV) an pagpupursige han Partido nga pamunuan an demokratiko nga rebolusyon han katawhan (DRK). Tikang han mahitanum han Partido an DRK ha rehiyon hadton dekada 1970, bisan kan-o waray magpapas an suporta han masa para ha rebolusyon. Ginpukaw han Partido an katawhan ha ira makaluluoy nga kamutangan, nga durot han pananalumpigos ngan paniniyupi han mga agaron maytuna ngan komersyante, mga burukrata kapitalista ngan dagko nga kumprador burgesya kakunsabo an imperyalismo nga US. Ginhangkop han masa an Partido ngan an programa han DRK komo tinuod nga solusyon ha kakurian, ha kawaray tuna han mga parag-uma ngan kawaray hin batakan nga serbisyo pankatilingban sugad han edukasyon, kalibsugan, ngan pabalay. Nakit-an nira an DRK komo dalan ngadto ha tinuod nga katalwasan ngan demokrasya.
Ha sakob hin masobra lima kadekada, kolektibo nga ginios an katawhan han EV ha balayan han DRK. Maiusgon nira nga ginpasulong an armado nga pakigbisog, nahilansar an mga taktikal nga opensiba, ngan napakusog an Bagong Hukbong Bayan, para ha ultimo nga katuyuanan nga rumkon an poder pampulitika han naghahadi nga estado ngan tukuron an tinuod nga gubyerno han katawhan. Ginpasulong han masa nga parag-uma an agraryo nga rebolusyon agud pauswagon an ira pakabuhi pinaagi han pagpaparayhak han produksyon para ha pagkaon ngan kita, ngan atuhan an matiyupion nga relasyon ha produksyon nga gin-uundong han agaron maytuna-komersyante. Ha mga lugar diin natukod an Pula nga pampulitika nga poder, ginkaurusahan han katawhan an mga palisiya hiunong ha proteksyon ha kalibungan ngan kamurayawan ngan kaayusan ha ira komunidad. Tungod kay ginhangkop han hiluag nga masa an DRK, hiniluag an impluwensya han rebolusyunaryo nga kagiusan tubtub ha mga sentro nga bungto ngan syudad.
An sugad nga kusog nga naabot ngan kadaugan nga nakab-ot han Partido ha EV an gintuyo nga rumkon han tanan nga niyutiyo nga rehimen tikang kan Marcos Sr ngan tubtub kanda Duterte ngan Marcos Jr, agud igpabilin an pananalumpigos ngan paniniyupi ha katawhan. Gin-gamit nira komo prinsipal nga armado nga pwersa an 8th Infantry Division samtang nagserbe nga tahub para sa todo-gerra an kampanya kontra-insurhensiya. Ginlansar an magkalain-lain nga oplan nga ngatanan pakyas ha hul-os nga pagtapos ha rebolusyunaryo nga pakigbisog han katawhan.
Tikang hadton 2018, nakit-an han EV an waray kapareho-nga-bangis nga todo-gerra han pasista nga estado kontra ha katawhan nga nakikigbisog. Diri mamenos ha 700 o 16% han mga barangay ha rehiyon an ginpailarum han militar ngan pulis ha de facto nga balaud militar nga may magkalain-lain nga tahub sugad han “lokalisado nga erestorya pankamurayawan” ngan Retooled Community Support Program. Gintatantiya nga tunga kamilyon katao an ginpailarum ha sugad nga pasista nga paghahadi. Diri mamenos ha 43,947, kadam-an masa nga parag-uma, an nagin biktima han panhadlok, panharas, intimidasyon tubtub ha mga kaso han pagsikmit, pagpatay, tortyur, iligal nga pag-aresto ngan detensyon. Ginkawatan ngan ginrub-an hira han pakabuhi, pwersahay nga ginpaebakwet, gin-imponeran han “lockdown” an mga komunidad ngan gindid-an nga magpakabuhi ha uma. Ginbiktima an mga menor de edad, kababayin-an, mga makamasa nga upisyal han barangay ngan bisan an mga organisasyon masa ha kasyudaran. Tikang hadto hasta yana, katuyuanan hini nga pasista nga terorismo han estado nga bungkagon an nahipundar nga poder han katawhan ngan tagan-dalan an pandabong ngan paniniyupi han mga naghahadi nga klase.
Ha butnga hini, nahiagum han mga destroso an rebolusyunaryo nga kagiusan ha rehiyon. Ginbunga ini han internal nga suhetibista nga mga kaluyahan, prinsipal an empirisismo, nga nakaulang ha kumprehensibo nga pagpapasulong han gerra han katawhan. An natikagrabe nga krisis han naghahadi nga sistema nga bagakolonyal ngan bagapyudal, kundisyon unta para mapapintas an armado nga pakig-away ngan mga panmasa nga pakigbisog, waray mahakbot. Diri nagin ngatanan-nga-gapil an mga pag-abante. Sa proseso, nahimo nga manhibang han pasista nga kaaway diri la ha rebolusyunaryo nga kagiusan kundi hasta ha base panmasa. Pira ha mga mga kadaugan han rebolusyunaryo nga kagiusan ngan masa madarahug nga ginbungkag.
Hadton Disyembre 2023, nanawagan an Komite Sentral han Partido nga maglansar hin kagiusan pagtutul-id agud igsalikway an mga sayop nga tendensiya ngan pakusgon an pamumuno han Partido ha rebolsyunaryo nga ungara han katawhan. Hul-os ini nga ginkalipay han mga rebolusyunaryo nga pwersa ha EV ngan ginhimo an tanan nga paningkamot agud mahipatuman ini ha magkalain-lain nga balitang. Kadungan han pagpintas han mga obhetibo nga kundisyon ha sakob ngan gawas han nasud, nagbunga an sugad nga mga paningkamot. Sugadpaman, mayda pa nga angay pauswagon ngan igtul-id agud pugngan an pagdudugo, bumuhat ngan hul-os nga makabiksal tipaabante.
Nagpapabilin an pirmihan nga krisis han sistema nga bagakolonyal ngan bagapyudal, nga amo an pareho nga mga kundisyon nga nagpahangkop ha masa ha Partido ngan ha programa hini han DRK masobra lima kadekada na an nakalabay. Ha paghilarum han krisis ngan kakurian han katawhan ngan kabuksas han kadunutan, pagin niyutiyo ngan pakuri han rehimen US-Marcos, dugang nga kinahanglan nga ipasulong an DRK. Ini an tukma ngan makatadungan nga baton ha nag-aaningal nga guliat han katawhan para ha rebolusyunaryo nga pagbabag-o.
Gin-aayat an mga rebolusyunaryo nga pwersa ha EV nga maisugon nga sugbungon an responsabilidad nga ipasulong an rebolusyunaryo nga pakigbisog han katawhan ngan ipakigbisog an ira demokratiko nga ungara. Ha giya han Partido, singabuton naton an kagiusan pagtutul-id agud pauswagon an aton rebolusyunaryo nga praktika ngan mahipaabot ha pinakadamo nga katawhan an programa han DRK. Pahugton naton an ira pagsantop hini ngan anihon an ira mapaso nga suporta. Igparayaw naton an DRK komo ira paglaum. Mahidadaug la an DRK kun natatagamtaman hini an mapaso nga suporta ngan paghangkop han pinakahiluag nga katawhan.
Hul-os an pagtapod han rebolusyunaryo nga kagiusan ha EV ha Partido ngan ha DRK. Gintatan-aw naton ang dugang pa nga mga kadaugan ha dirudiretso nga pagpapasulong han kagiusan pagtutul-id ngan han DRK ha tiarabot nga mga panahon.
Mabuhay an Partido Komunista ng Pilipinas! Mabuhay an demokratikong rebolusyon han ktawhan!
Mabuhay an katawhan nga nakikigbisog!
Singabuton an kagiusan pagtutul-od! Ngatanan-nga-gapil nga ipasulong an demokratiko nga rebolusyon han katawhan!
