Hugot nga nakighiusa ang Pambansang Katipunan ng mga Magbubukid-National Democratic Front (PKM-NDF)-Lanao del Sur sa mga mag-uuma sa Amai Manabilang, Lanao del Sur sa inyong lig-ong pagbarug ug pagsukol batok sa pagpangilog sa yuta sa rehimeng US-Marcos, sa EcoPlanet Bamboo ug sa pamilyang Manabilang.
Among gidayeg ang inyong determinasyon aron panalipdan ang katungod sa pagtikad ug kasigurohan sa yutang gitikad.
Subay sa among nasayran, sukad niadtong 2022 gihimong plantasyon sa kawayan sa Amerikanong kompanyang EcoPlanet Bamboo ang inyong kayutaan. Apektado kamong mga mag-uumang Moro, lumad ug setler (dayo) nga nagtikad sa 7 ka sitio nga nasakop sa 6 ka baryo sa Amai Manabilang Lanao del Sur. Gipangtamnan sa kawayan ang inyong mga umahan.
Ang maong kayutaan nasulod sa 18,000 ektaryas nga gipanag-iyahan kuno sa Southern Philippines Development Authority o SPDA. Ang SPDA usa ka korporasyon sa gobyerno nga direktang nailalom sa opisina sa presidente sa Pilipinas nga maoy tigpasulod sa mga imbestor. Kakunsabo ang pamilyang Manabilang ug ang lokal nga gobyerno nga giharian nila, nahulga nga mawad-an sa yutang matikad ug panginabuhian ang liboang katawhan.
Sugod niadtong Mayo 20, 2025 nagsugod ang laing hugna sa ilang pagpananom sa kawayan. Binantayan sa mga pwersang pangkombate sa 1st Infantry Division-Philippine Army, nga walay hunong sa paglunsad sa operasyong militar ug pagpanghasi sa mga tawo, gilukop sa EcoPlanet Bamboo og tanom sa kawayan ang inyong mga umahan bisan kadtong may nagturok pa nga mga pananom.
Apan imbes mahadlok kamo, nakat-on hinuon kamo sa pagsukol. Ang inyong kalihukan sa pagpang-ibot sa mga kawayan nga gitanom sa mga uma nahimong kaylap nga tago nga kalihukan sa mga sitio nga apektado. Tungod niini, nakapadayon kamo sa inyong panginabuhian.
Ang inyong pagsukol nagpakita sa kaandaman nga makigbisog aron panalipdan ang inyong panginabuhian ug katungod sa yuta. Nagpakita usab kini sa inyong kaisog nga atubangon ang pagpanghasi sa militar ug ni Manabilang.
Angay himoong panag-ingnan sa ubang mga lugar nga may susamang problema ang inyong gihimo. Inyong gipakita pinaagi sa kaugalingong paglihok nga mahimo natong batokan ang mga nagadaugdaug kanato.
Apan dili pa kini paigo. Angay masabtan natong tanan nga ang nag-unang kaaway natong mga mag-uuma mao mismo ang reaksyunaryong gobyerno ni Marcos nga maoy nagpagahum sa SPDA aron mangilog og yuta. Angay masabtan usab nga ang walay lipud-lipod ug kabangis sa pamilyang Manabilang tungod sa ilang paghari sa lokal nga gobyerno. Busa lahutay kini nga problema ug busa kinahanglang malahutayon usab ang pakigbisog hangtud mapukan ang gobyernong tigpanalipod sa mga dagkung agalong yutaan ug langyaw’ng agri-korporasyon ug mapatuman ang tinuod nga reporma sa yuta. Bugtong ang armadong rebolusyon lang ang makahatag og katumanan sa pangandoy nga makaangkon og yutang matikad.
Busa, aron makalahutay sa pagpanalipod sa yutang gitikad, kinahanglang tukoron ang hugot nga panaghiusa sa tanang baryo ug sitio nga apektado sa mga kontra-katawhan ug makilangyaw nga mga proyekto sa SPDA ug sa gobyernong Marcos. Kinahanglang makighiusa sa ubang mag-uumang apektado sa ubang mga proyekto sa SPDA sama sa plantasyon sa kakaw sa Kennemer Foods, Inc ug sa plantasyon sa mais sa Asia-Pacific Precision Agriculture. Kinahanglang makighiusa sa mga mamumuong panguma sa mga plantasyon sa saging ug pinya sa SUMIFRU, MKAVI, ug uban pa. Kinahanglang makighiusa sa mga mag-uumang nahulga mailogan sa yuta tungod kay nasulod sa 42,000 ektraryang Camp Kibaritan military reservation sa AFP ang ilang kayutaan. Kinahanglang makighiusa sa kinabag-ang mag-uumang Pilipino aron tapuson ang pag-akup-akop sa yuta sa dagkung agalong yutaan ug mga langyaw’ng agri-korporasyon. Kinahanglang maghiusa ang katawhang lumad, Moro ug mga setler batok sa komon nga kaaway.
Padayong mag-armas ug magpasampa sa New People’s Army. Pinaagi sa pagpalig-on sa atong Hukbo, ang NPA, makasiguro kita nga dunay hinagiban kitang ikapanalipod batok sa mga mangingilog sa yuta nga mga burukrata, langyaw’ng korporasyon ug agalong yutaan.
Mabuhi ang masang nakigbisog!
Panalipdan ang katungod sa yutang gitikad!
Panalipdan ang katungod nga manginabuhi!
Iasdang ang armadong rebolusyon!
Magpa-membro sa PKM!
Salmot sa New People’s Army!
