Mariing kinundena ng Kilusang Magbubukid ng Masbate ang mga ulat ng pang-aabuso at krimen ng mga tropa ng 65th IB, 2nd IB, 96th IB at 96th MICO sa mga residente ng Palanas, Masbate.
Noong Abril 2, sinunog ng mga sundalo ang bahay ni Roel Yase, residente ng Barangay Buenasuerte. Ginamit ng mga sundalo sa barangay na ito, gayundin sa Barangay San Isidro, ang tubig pang-inom ng mga residente para hugasan ang kanilang mga motorsiklo. Napakahalaga sa mga residente ang pagtitipid sa tubig lalo’t tag-init at maraming mga balon ang wala nang makukuhang tubig. Ang barangay na nito rin ang nagbabayad sa singil sa kuryente na kinonsumo ng mga sundalo.
Noong Abril 24, alas-7 ng umaga, pinasok ng mga sundalo ang isang bahay sa Barangay Miabas na may dalang isang sako ng may lamang mga magasin, mga bala at radyo para palabasing pagmamay-ari ito ng nakatira sa bahay. Dahil sa pagtanggi ng padre de pamilya sa utos ng mga sundalo, itinali, pinadapa at sinipa ng mga ito ang dalawang binata niyang mga anak. Binantaan silang na gigilitan ng leeg. Pagkatapos ng insidente, dinala ang mga biktima sa lungsod ng Palanas. Napilitan lamang ang mga sundalo na pakawalan kinabukasan ang mga biktima matapos pumunta ang pamilya at kamag-anak kasama ang mga upisyal ng barangay ng Miabas at iginiit na lehitimong residente at sibilyan ang mga biktima. Sa kabila nito, patuloy na ipinailalim sa surbeylans ang pamilya na nagdulot ng ligalig at matinding abala sa kanilang paghahanapbuhay.
Nagpahayag naman ng malubhang pagkabahala ang mga residente ng Palanas sa planong pagpapaputok ng mortar mula sa Barangay Nepa tungo sa Barangay Parina. Sa kabila ng pagtutuol ng mga residente at upisyal ng barangay, itutuloy ang plano sa Mayo 15. Inaasahan ang katulad na aktibidad sa bayan ng Cataingan.
Nananawagan ang KMM, kasama ang lahat ng mag magsasaka at mamamayan ng Masbate sa lahat ng lingkod-bayan mula sa barangay hanggang prubinsya na pakinggan ang hinain ng kanilang kinasasakupan at protektahan sila mula sa pang-aabuso ng militar. Makiisa at pangunahan sa pagpasa ng resolusyon at petisyon na mahigpit na ipagbawal ang paghihimpil sa sentro ng mga baryo at paggamit sa mga pampublikong pasilidad.
