Ginapanginbulahan sang Makabayang Kilusan ng Bagong Kababaihan (MAKIBAKA)-Negros ang pagselebrar sang Adlaw sang mga Kababaenhan sa bilog kalibutan subong.
Subong man, nagabayaw kita sang mataas nga pagpasidungog sa mga rebolusyonaryong kababaenhan nga naghatag sang ila bilidhon nga papel sa pagbag-o sa garok nga sosyedad nga wala sang pagduha-duha nga nagbuhis sang kabuhi kag nag-alagad sa interes sang malapad nga katawhan kaangay nanday Florida Ceballos, Kerima Tariman, Marilyn Badayos, Charity Amacan, Maryjane Magquilat, Emaren Pastidio, Glenda Tinio Mejares, Sara Alvarez, kag iban pa.
Daku ang nangin kontribusyon sang kababaenhan sa pag-uswag sang aton katilingban apang ginlansang lamang sang mapanghusga sa sosyedad nga mangin mahuyang kag tigserbe lamang sa kabataan, bana kag panimalay.
Tuman nga pagpamigos ang ila naaguman sa nagaluntad nga sistema. Masami nangin biktima sila sa diskriminasyon sa kusog, trabahuan, sekswalidad kag pagtrato. Nangin biktima man sila sa nagakadunot kag dekadente nga kultura sa diin nagaresulta sini sang lapnagon nga kaso sang pagbusong nga menor-de-edad o teenage pregnancy, pagpangbastos, pagpang-rape kag iban pa.
Sa pihak nga bahin, bisan may ginpasar nga laye ang reaksyunaryong gubyerno para sa pagpangapin sa kinamatarung sang kababaenhan, paslaw ini nga depensahan ang dungog sang mga sandigan nga kinamatarong sang kababaenhan tungod ang mga yara sa poder mismo ang nagapanguna nga nagatapak kag tig bayolar sini. Kaangay sang mga panghitabo sa subong nga pagpangbastos nga hinimuan sang mga kongresista, senador kag bisan sa isa ka abogado.
Sa kabukiran, masami ang mga kababaenhan ang biktima sa mga pagpanglapas sang tawhanon nga kinamatarung tuga sang malawig kag nagasingki nga operasyon militar sang Armed Forces of the Philippines (AFP), Philippine National Police (PNP), kag ila mga paramilitar.
Gani, ginaabi-abi sang Makibaka-Negros ang pagpatuman sang mga Pulang hangaway sang Apolinario Gatmaitan Command-New People’s Army (AGC-NPA) sa pagpahamtang sang rebolusyonaryong hustisya batok sa mga intel aset sang AFP lakip na ang mga malain nga elemento. Ini nga mga indibidwal amo ang katimbang sang AFP sa pagsabwag sang kakugmat sa pumuluyo ilabi na sa mga kababaenhan.
Subongman, sa nagalala nga krisis sang kaimulon, kawad-on sang trabaho, manubo nga sweldo kag halos wala sang benepisyo samtang nagapadayon ang pagsirit sang mga presyo sang nagpanguna nga balaklon, dako nga palalibgan sa mga iloy sa puluy-an paano paigu-on ang kita sa pang adlaw-adlaw nga panginahanglanon, indi lang sa kasyudaran kundi sa kabukiran. Kung gani, nagakapilitan ang iban nga mga iloy nga magbiya sa ila puluy-an kag magpasimpalad nga makatrabaho sa iban nga pungsod.
Sa subong nga sitwasyon, nagakadapat nga manindugan ang mga kababaenhan kag indi lamang magpabilin sa apat ka pamusod sang aton puluy-an. Dako ang aton papel para maisulong ang matuod nga pagbag-o. Magguwa sa kinaandan kag mag-uyat sang armas kag isulong ang demokratikong rebolusyon sang banwa tubtob nga malab-ot ang matuod nga kahilwayan kag hustisya sosyal.
Maghimakas, indi mahadlok!
Mag-intra sa NPA!
