Saritaan iti kapya, ituloy! Nagtipon dagiti grupo a maka-kapya idi Nobyembre 21 idiay Manila tapno lagipen ti makatawen nga anibersaryo ti Oslo Joint Statement ti Gubyerno ti Pilipinas (GRP) ken National Democratic Front of the Philippines (NDFP) a pinirmaan da idi Nobyembre 23, 2023. Inyebkas da ti namnama da iti balbaliw a panaglukat ti saritaan, kagiddan ti panagdanag da iti agsasaruno a panag-aresto kadagiti konsultant ti NDFP idi Oktubre. Ti taripnong ket inyuna ti Council of Leaders for Peace Initiatives.

Nagtignay ti Friends of the Filipino People in Struggle ken dagiti kameng daytoy idiay United States, Canada, Netherlands, Hong Kong ken dadduma pay a pagilyan idi Nobyembre 30 kas suporta iti NDFP. Kinundenar da ti panagipawil ken panagatake kadagiti konsultant iti kapya ti NDFP iti napalabas a tawtawen.

Piket dagiti mangmangged idiay Pampanga. Nagitakder ti piket dagiti mangmangged ti SG Farms Processing Plant ken Maximus Dressing Plant iti Barangay San Isidro, San Simon, Pampanga tapno labanan ti iligal a panagserra ti planta. Intakder ti Maximus Employees Union-NAFLU-KMU ti piketlayn da idi Oktubre 8 ken nagpanawagan ti separation pay ken panangala kadakuada ti ahensya. Kellaat nga inserra ti planta idi agparehistro dagiti mangmangged ti union da idi Hulyo. Sinaruno daytoy ti piket dagiti mangmangged ti SG Farms a kaabay daytoy a planta.

Karbengan iti pagbiagan, inrupir dagiti aglaklako idiay Davao City. Napan idiay Davao City Hall idi Nobyembre 22 dagiti aglaklako iti sidong ti Agdao Laray Muslim and Christian Vendors Association tapno ikkan isuda ti proteksyon laban iti kanayon a “clearing” ken pangta ti demolisyon a kunada ket mangituntunda ti panagdanag kadagiti tagilako ken karbengan da iti pagbiagan. Nagpanawagan da iti lokal a gubyerno nga agiruar ti resolusyon tapno maikkan isuda ti kaskenan nga espasyo tapno natalged da a makapagsapul. Maysa nga aldaw sakbay daytoy, nagisayangkat da ti tignay idiay Rizal Park idiay syudad.