Hambalanay sa kalinong, ipadayon! Nagtipon ang mga grupo nga maki-kalinong sadtong Nobyembre 21 sa Manila agud handurawon ang isa ka tuig nga anibersaryo sang Oslo Joint Statement sang Gobyerno sang Pilipinas (GRP) kag National Democratic Front of Philippines (NDFP) nga ginpirmahan sadtong Nobyermbre 23, 2023. Ginpahayag nila ang ila paglaum nga liwat mabuksan ang hambalanay, kadungan sa ila pagkahangawa sa sunod-sunod nga pag-aresto sa mga konsultant sang NDFP sadtong Oktobre. Ginpangunahan ang pagtililipon sang Council of Leaders for Peace Initiatives.
Nag-aksyon ang Friends of the Filipino People in Struggle kag mga katapo sini sa United States, Canada, Netherlands, Hong Kong kag iban pa nga pungsod sadtong Nobyembre 30 bilang suporta sa NDFP. Ginpakamalaut nila ang pagpangsumpo kag pag-atake sa mga konsultant pangkalinong sang NDFP sa nagligad nga mga tinuig.
Piket sang mga mamumugon sa Pampanga. Naghimo sang piket ang mga mamumugon sang SG Farms Processing Plant kag Maximus Dressing Plant sa Barangay San Isidro, San Simon, Pampanga agud awayon ang iligal nga pagsira sang planta. Gintukod sang Maximus Employees Union-NAFLU-KMU ang ila piketlayn sadtong Oktobre 8 kag nagpanawagan sang separation pay kag pagkuha sa ila sang ahensya. Kalit nga ginsira ang planta sang magparehistro ang mga mamumugon sang ila unyon sadtong Hulyo. Ginsundan ini sang piket sang mga mamumugon sang SF Farms nga katambi nga planta sini. Ginapatihan sang mga mamumugon nga isa lang ang tag-iya sang mga planta nga ini.
Kinamatarung sa palangabuhian, giit sang mga tindera sa Davao City. Nagkadto sa Davao City Hall sadtong Nobyembre 22 ang mga tindera sa idalum sang Agdao Laray Muslim and Christian Vendors Association agud hatagan sila sang proteksyon batuk sa masami nga “clearing” kag peligro sang demolisyon nga siling nila nagatuga sang pagkahangawa sa ila mga paninda kag kinamatarung nila sa palangabuhian. Nagapanawagan sila sa lokal nga gobyerno nga magpagwa sang resolusyon agud mahatagan sila sang nagakaigo nga espasyo agud malinong nga magpangabuhi. Isa ka adlaw antes sini, naglunsar sila sang aksyon sa Rizal Park sa syudad.
