Malampusong gipahigayon sa National Democratic Front of the Philippines (NDFP) ang ikatulong internasyunal nga teoretikanhong kumperensya sa Amsterdam, The Netherlands niadtong Nobyembre 29-30. Ang topiko sa kumperensya mao ang teorya sa nasudnong kagawasan gikan sa imperyalismo. Gitambungan kini sa 114 ka indibidwal nga nagrepresentar sa 57 ka proletaryo-sosyalistang partido, kalihukan sa nasudnong kagawasan ug anti-imperyalistang organisasyon.
Kahinumduman nga gipahigayon ang una ug ikaduhang teoretikanhong kumperensya niadtong Oktubre 2023 ug Marso 2024 nga naghisgot sa imperyalistang gubat ug imperyalistang krisis sa ekonomiya. Matud sa NDFP, unod sa ikatulong kumperensya ang mga teoretikal ug praktikal nga kontribusyon nilang Lenin, Stalin ug Mao kabahin sa nasudnong kagawasan, lakip ang lain-laing pamaagi sa pagduso ug pagpasiugda sa katungod sa kaugalingong paghukom, armado ug dili armado. Gigahin ang unang adlaw sa kumperensya sa presentasyon sa giandam nga mga kontribusyon. Gipahigayon ang plenaryo sa ikaduhang adlaw diin gisuma ang mga punto sa mga delegado.
Lakip sa mga topiko nga gihisgutan mao ang kadaut nga gidala sa mga imperyalistang agresyon ug mga proxy war sa kagawasan ug kaugalingnan sa mga nasud. Lakip usab sa mga diskusyon ang nagkalain-laing isyu nga giatubang sa wala pa nahuman nga mga kalihukan sa pagpalingkawas, ug ang panginahanglan sa pagpadayon sa pagkonsolida ug pagpanalipud sa nakab-ot na nga mga kadaugan. Usa sa mga gihisgutan mao ang pagmugna ug pagpalig-on sa internasyunal nga suporta alang niining mga kalihukan.
Gikalipay pag-ayo sa Partido Komunista sa Pilipinas (PKP) ang paghisgot sa nasudnong kagawasan sa ikatulong kumperensya. Nakasulat sa nag-unang artikulo sa tigum nga gisulat sa Komite Sentral sa PKP: “Ang pakigbisog sa dinaug-daug nga katawhan sa tibuok kalibutan alang sa kagawasan nagsilbing usa sa mga krusyal nga elemento sa kinatibuk-ang estratehiya aron iasdang ang internasyunal nga rebolusyonaryong tinguha sa proletaryo.”
Sumala niini, tungod sa pagpanglupig sa imperyalismo, nahimong daku ang tinguha sa katawhan alang sa nasudnong kagawasan o kaugalingong paghukom gikan sa kolonyalismo. Niining mga nasura, konektado ang dagkung burges-kumprador sa kolonyal nga ekonomiya ug itoy sa mga imperyalista, ug huyang ang petiburges ug nasudnong burgesya. Busa, giabaga sa hut-ong mamumuo ang katungdanan sa paghiusa sa tanang gidaug-daug nga hut-ong ug sektor ug pagpangulo sa pakigbisog alang sa nasudnong kagawasan. Sa panahon sa imperyalismo ug proletaryong rebolusyon, mitumaw ang bag-ong tipo sa burges-demokratikong rebolusyon nga gipangulohan sa proletaryo, ug ginaasdang isip unang lakang alang sa paglunsad sa sosyalistang rebolusyon ug konstruksyon.
Ang kontribusyon sa lain-laing partisipante sa kumperensya nakatabang sa pagpalalum ug pagpalambo sa diskusyon kabahin sa nasudnong kagawasan. Gipaambit sa rebolusyonaryong grupo gikan sa Cyprus ang papel nga gibuhat sa ilang teritoryo sa imperyalistang mga gubat sa Middle East ug North Africa. Sa kasamtangan, gigamit kini sa lima ka gahum sa NATO (Turkey, Greece, US, United Kingdom ug France) isip base ug lunsaran sa kampanya sa henosidyo sa US ug sa Zionistang Israel sa Palestine, ingonman sa pagpalapad sa gubat agresyon sa Middle East.
Sa laing bahin, gipresentar sa mga komunistang pwersa sa Turkey ug Kurdistan ang magkalambigit nilang pakigbisog. Ang kalihukang Turkish isip kalihukan nga nakigbisog sa usa ka nasud nga gidumalahan sa mga imperyalistang gahum, samtang ang kalihukang Kurdish gidaug-daug sa kumprador nga estado sa Turkey. Lalum usab ang koneksyon sa kalihukan sa Kurdistan sa Palestine, diin unang nagbansay ang ilang mga manggugubat.
Sa kinatibuk-an, nahimong mabungahon ang mga diskusyon ug nakab-ot ang bag-ong ang-ang sa panaghiusa tali sa mga delegado. Nagpadayag usab ang mga Partido ug organisasyon sa ilang direktang suporta sa kalihukan sa pagpalingkawas sa Palestine ug sa mga grupo nga nagsuporta niini, lakip ang Hamas. Gawas sa gihisgutan nga mga nasud, nagsumite usab sa ilang kaugalingong mga kontribusyon ug panglantaw ang mga kauban gikan sa Eritrea, Nepal, Senegal, Italy ug US.
Sa pagtapos sa kumperensya, gipahigayon ang usa ka espesyal nga kultural nga pasundayag niadtong Nobyembre 30 isip pagsaulog sa ika-60 nga anibersaryo sa Kabataang Makabayan ug ang makasaysayanong papel niini sa pagpaasdang sa rebolusyonaryong kalihukan sa kabatan-onan sa Pilipinas ug pag-awhag sa panaghiusa sa rebolusyong Pilipino.
