Giambus sa Bagong Hukbong Bayan (BHB)-Bukidnon ang nag-operasyon nga tropa sa militar sa Namnam River sa Barangay St. Peter, Malaybalay City, Bukidnon niadtong Oktubre 24. Tulo ang napatay sa mga pasistang sundalo ug nasakmit gikan kanila ang usa ka ripleng R4, vest ug mga magasin, pistola, 10 ka bakpak, mga bala ug uban pang suplay.

Nahimo sa BHB ang taktikal nga opensiba niini atol sa mga focused military operations sa mga batalyon sa Armed Forces of the Philippines sa rehiyon. Sa wala pa kini, giatake sa BHB ang tropa sa 26th IB sa Sityo Kimam, Barangay Binicalan, San Luis, Agusan del Sur niadtong Oktubre 14. Nasakmit gikan sa mga sundalo ang upat ka bakpak ug uban pang kagamitang militar.

Niadtong Oktubre 22, na-engkwentro sa BHB ang 26th IB sa Barangay Binicalan. Namartir sa maong engkwentro si Ike Dahonay (Ka Tres). Dili moubos sa lima ka sundalo sa 26th IB ang gibanabanang napatay samtang daghan pa ang nasamdan, sumala sa yunit sa BHB.

Aktibong depensa. Sa Masbate, nakadepensa ang mga yunit sa BHB-Masbate (Jose Rapsing Command) batok sa sulayng pag-reyd sa AFP sa ilang kampo sa lungsod sa Uson ug Baleno niadtong Nobyembre. Pito ka sundalo ang gikatahong napatay sa aktibong mga depensa samtang pito pa ang nasamdan.

Niadtong Nobyembre 22, gisuklan sa BHB ang 2nd IB sa Sityo Pile, Barangay San Jose, Uson. Nakadepensa usab ang yunit sa BHB-Masbate niadtong Nobyembre 20 batok sa 96th IB sa Barangay Cancahorao, Baleno. Nadakop human sa engkwentro ang usa ka Pulang manggugubat. Nanawagan ang BHB-Masbate nga tahuron ang katungod sa nadakop isip hors de combat o manggugubat nga wala sa kahimtang nga makig-away.

Sa Oriental Mindoro, napakyas sa mga Pulang manggugubat ang pag-atake sa 76th IB ug 203rd IBde batok sa yunit nga nakapwesto sa Sityo Camilian, Barangay Bugtong na Tuog, Socorro niadtong Nobyembre 18. Duha ka pasistang sundalo sa rehimeng Marcos ang napatay sa aktibong pagdepensa sa hukbong bayan samtang daghan ang nasamdan.