Press Statement | July 19, 2017
Gilunsad sa Bagong Hukbong Bayan – North Eastern Mindanao Region ang sunod-sunod nga mga aksyong militar batok sa mga pwersa sa AFP, CAFGU, mga lunod-patay nga kontra-rebolusyonaryo, sa makadaut nga plantasyon ug sa mga negosyanteng abusado. Nahitabo ang maong mga aksyong militar sulod lang niini nga semana sa Hulyo atol sa pagpalanog sa rehimeng Duterte nga lugwayan pa ang pagpatuman sa martial law sa Mindanao hangtud sa katapusan sa tuig 2017.
Niadtong Hulyo 18, sulod lang sa usa ka adlaw, nalunsad sa mga Pulang manggugubat sa nagkalain-laing natarang gerilya sa rehiyon ang mga aksyong militar.
Surigao del Sur: Sa lungsod sa Cortes sa may alas 6:00 AM , gidis-armahan sa BHB-Front 30 ang Vice Mayor Emmanuel Suarez ning maong lungsod. Nasakmit ang 2 ka .45 kalibreng pistola, 1 ka shot gun, 1 ka KJ sub machine gun, 2 ka granada, 1 ka VHF ug 4 ka box sa mga bala sa .45 pistol.
Surigao City: Sa Barangay Rizal sa may alas 9:00 AM, gisilotan sa BHB-Front 16 ang Mamsar Construction pinaagi sa pagguba sa mga ekwepo niini sama sa forklift, backhoe ug sakyanang multicab. Nasakmit usab sa maong aksyon ang 2 ka shot gun. Kining maong kompanya wala mag-ila ug mituman sa mga rebolusyonaryong palisiya sulod sa erya sa gobyerno sa katawhan
Surigao del Sur: Sa Sityo Ibo, Brgy. Anahaw Daan sakop sa lungsod sa Tago sa may 11:30 AM hangtud sa 3:10 PM, malampusong nalunsad sa BHB Front 19 ang pagtapas sa dili moubos sa 6 ka ektaryang sagingan (10 blocks) sa plantasyon sa Dole-Stanfilco ug pagguba sa 6 ka sakyanang elf niini. Ang maong aksyon kabahin sa pagsilot sa kompanya sa padayon niining pagpangilog og yuta ug paggamit sa kemikal nga nagdaut sa kinaiyahan ug panglawas sa katawhan.
Samtang niadtong Hulyo 17 sa may 2:30 sa hapon giharas sa usa ka grupo sa BHB-Front 8 ang nag-operisyon nga mga pwersa sa 3rd SFB PA sa Brgy. New Salem, Bayugan, Agusan del Sur. Walay gikatahong kaswalti sa kaaway sa maong aksyon ug luwas nga nakaatras ang mga Pulang manggugubat.
Niini gihapon nga adlaw sa alas 7:00 sa gabii, gisilotan sa usa ka grupo sa BHB-front 21, ang usa ka membro sa CAFGU nga si Oning Lumacang didto Sityo Iyao, Anticala, Butuan City. Si Lumacang usa sa kanhing membro sa BHB nga milayas ug nagdala og armas. Sa hangyo sa iyang mga paryente ug pamilya nga areglohon ang iyang kaso nahatagan siya og higayon aron hulipan ang iyang sala sa pila na ka tuig nga milabay. Apan, taliwala niini malimbungon kining nakig-kunsabo sa AFP ug aktibong nigukod sa rebolusyonaryong kalihukan.
Kining maong mga aksyong militar gikinahanglan alang sa pagpasibaw sa interes sa katawhan batok sa pagpangdaug-daug ug pagpahimulos sa mga hakog nga mga kapitalista ug negosyante sa rehiyon nga dugay nang midaut sa kinaiyahan ug mihukhok sa kahago sa mga mag-uuma ug mamumuo.
Labaw sa tanan, gikinahanglan kini sa pagpakusog sa malungtarong gubat sa katawhan aron epektibong mapanalipdan ang kaayuhan sa katawhan ug rebolusyonaryong kalihukan gikan sa kabangis sa martial law ni Duterte, Oplan Kapayapaan ug todo-gera. Ilabina na karon nga mas migrabe ang mapanumpuong lakang sa AFP dinhi sa rehiyon sama sa subsob nga operisyong militar, pagpatay sa mga lider mag-uuma nga sila Meliton Catampongan sa Alegria, Surigao del Norte ug Silvestre Maratas sa San Miguel, Surigao del Sur, pagpig-ot sa mga katungod sa katawhan, pagpanghulga ug pagguba sa mga eskwelahan sa Lumad.
Hugot batukan ang mapanumpuong lakang ug martial law sa rehimeng Duterte !
Ka Ariel Montero
Tigpamaba
Regional Operational Command
