Padayon nga nangin biktima ang mga inosenteng sibilyan sa pokus kag sustenidong operasyon militar sang 94th IB sa magkatambi nga mga syudad sang Kabankalan kag Himamaylan halin pa sa bulan sang Mayo tubtob subong.
Sadtong Agosto 21, sa Sityo Bigo, Barangay Oringao, Kabankalan City, Negros Occidental, ginpaypay sang naka-bonnet nga tawo si Renante Endonilia, 31 anyos, kag ginpasunod siya sa unahan kon diin ginpasakay siya sang Hilux nga salakyan. Nakilal-an nga mga berdugong militar ang sakay sini upod ang mga traydor sa rebolusyon nga sanday “Miguel” Quiador kag Dolon “Suyo/Ben” Andres.
Gin-interogar si Endonilla kag ginpahug nga patyon ang iya asawa kag duha ka anak kon indi mag-ako nga siya ang nagadul-ong kag nagasugat sang mga NPA.
Ginpasibangdan man sa nasambit nga militar si Floreta Modico, 51 anyos, ang iloy ni Endonilla, nga amo ang tagluto sang sud-an sang mga NPA. Dugang sini, ginpatawag man sang mga tropa militar sa amo gihapon nga rason ang iya himata nga si Nonoy Navas.
Samtang, ginpatawag sa proper sang Kabankalan City si Jojo Villadares, taga Sityo Kalangkang, Barangay Buenavista, Himamaylan City, Negros Occidental sa nagpakilala nga police sang Bacolod Police Regional Office 6. Ginpasibangdan ang biktima nga may angot sang NPA.
Si Villadares isa sa biktima sa pagpang-ipit sang 94th IB gamit ang traydor sa rebolusyon nga si Bantol “Koling” Pacolanang.
Biktima man ang pamilya ni Villadares sa pagpangsunog sang ila balay sadtong bulan sang Marso. Ini panahon sang damo nga presensya sang tropa militar sa ila lugar.
Samtang, liwat nga ginpatawag sang 94th IB si Bukloy Tagini sa ila detatsment sa Barangay Mahalang, Himamaylan City, bangud sang kaakig sa nasambit nga militar militar nga nabuyagyag ang ila hinimoan sa amo nga pamilya. Madumduman nga sang ligad adlaw lang, pilit nga ginpainom antes gintayaan sang armas luthang sang mga soldado si Tagini.
Lubos nga ginkondenar sang Romeo Nanta Command -New People’s Army (RNC-NPA) ang asud-asud nga mga kalakasan sang 94th IB batok sa mga inosenteng sibilyan, ilabi na sa mga mangunguma kag mga Indigeous Peoples.
