Itinatag ng mga grupo ng magsasaka at myembro ng komunidad sa Cordillera ang Kanatengan Network bilang kapulungang magbubuklod sa mga magsasaka ng gulay sa buong rehiyon sa pagtatanggol ng kanilang mga karapatan at pagsusulong ng kongkretong mga pagbabago sa patakaran ng estado.
Binuo ang network matapos ang dalawang araw na palihan ng mga hardinero noong Hulyo 13-14 sa Mount Data Hotel, sa Bauko, Mountain Province na pinangunahan ng Cordillera Peoples Alliance (CPA) at ng alyado nito na Alyansa dagiti Pesante iti Kordiliera (APIT TAKO). Nasa halos 100 ang kalahok sa aktibidad na kumakatawan sa mga iba’t ibang organisasyon ng mga magsasaka ng gulay at komunidad ng mga magsasaka sa Benguet, Ifugao at Mountain Province.
Ipinangalan na Kanatengan Network ang bagong pormasyon upang itampok ang kilalang hanay ng mga bayan sa Cordillera sa tatlong lalawigan na nagpuprodyus ng malaking bahagi ng suplay ng gulay sa kabundukan ng bansa. Ang mga lugar na ito ay tinatawag ding “vegetable belt” ng Pilipinas.
Nakatuntong ang aktibidad sa mga pagsisikap na makakalap ng datos hinggil sa produksyon ng gulay. Dito, inilahad ng mga magsasaka ang detalyadong tala sa gastusin sa pagtatanim ng mga gulay sa malamig na klima tulad ng repolyo, sitaw, sweet peas, patatas, at sayote. Mula sa mga impormasyong ito, naging malinaw ang bigat ng krisis na kinakaharap ng mga magsasaka at nagsilbing batayan sa pagbuo ng Kanatengan Network.
Sa palihan, binigyang-diin ng mga kalahok ang mga pangunahing salik na nagdudulot ng pagkalugi sa mga maraming magsasaka. Kabilang dito ang napakataas na gastos sa produksyon, mula sa mga input sa sakahan hanggang sa transportasyon, kasabay ng labis na pabagu-bagong presyo sa pamilihan. Nagphayag din ng pagkabahala ang mga magsasaka sa smuggling ng imported na gulay at iba pang epekto ng liberalisadong industriya ng gulay. Anila, sinisira nito ang lokal na produksyon at lalong nagpapalala sa kanilang bulnerableng kalagayan.
Mula sa mga talakayan, pinagtibay ng mga kalahok ang anim na agarang panawagan: 1) ipatupad ang makatarungan at patas na floor price para sa mga gulay; 2) ipagkaloob ang sapat na subsidiya sa agrikultura para sa mga magsasaka; 3) itayo ang matagal nang ipinangakong farm-to-market road at ayusin ang mga sirang kalsada; 4) tiigil ang pag-angkat ng mga gulay na direktang kumokompetensya sa lokal na ani; 5) ibaba ang usura at upa sa lupa; at 6) ibaba ang presyo ng mga input sa pagsasaka.
Sinuportahan din ang Gardinero Workshop at ang paglulunsad ng Kanatengan Network ng Cordillera Women’s Education Action Research Center (CWEARC) at KATRIBU – Kalipunan ng Katutubong Mamamayan ng Pilipinas.
