Mariing kinundena ng grupong Salinlahi ang henosidyo ng Zionistang Israel sa Palestine na nagdudulot ng walang kapantay na pagdurusa sa mga bata sa Gaza. Binatikos ng grupo ang suporta ng US at United Kingdom sa henosidyong ito sa anyo ng mga armas, tauhan at pondo.
Umaapaw ang ebidensya ng krimen laban sa sangkatauhan ng Israeling mga sundalo ng binansagang Israel Occupation Force o IOF. Sila ang direktang responsable sa pagpaslang, pagkalumpo at pagkagutom ng mga bata. Ayon sa mga doktor sa Gaza, sistematiko ang pagpaslang ng mga sundalong ito sa mga bata. May mga ulat din na tinatarget ng mga sundalo ang kanilang mga ulo at dibdib. Kamakailan lamang, tatlong bata ang napaslang nang bumagsak ang ayuda na hinulog mula sa himpapawid sa pansamantalang tirahan ng mga Palestino. Hindi bababa sa 175 na Palestino ang namatay dahil sa gutom at malnutrisyon, kabilang ang 93 na bata. Halos 41,000 na mga bata ang nanganganib na mamatay, habang nasa 117 na bata ang namatay dahil sa malnutrisyon. Tinaguriang “pinakabrutal na henosidyo” sa kasaysayan ng sangkatauhan ang nangyayari ngayon sa Gaza. Walang ligtas na lugar para sa mga bata sa Palestine.
Dagdag dito, sistematikong pinagkakait ang mga ayuda, pinoprotektahan ang mga setler na humaharang at sumisira sa mga suplay para sa mga Palestino, habang nahaharap sila sa matinding kagutuman. Kahit ang mga bata ay binubuwis ang kanilang buhay para makapunta sa nakakamatay na mga distribution site ng Gaza Humanitarian Foundation upang makakuha ng pagkain para sa kanilang pamilya. Karamihan sa mga bata ay ulilang lubos, tanging naiwan para alagaan ang kanilang mas nakababatang kapatid.
Buong pagmamayabang pang pinapaskil ng mga sundalong IOF ang kanilang sarili sa social media habang binobomba nila ang mga sibilyan, ospital at kabahayan, at sa kanilang panggigipit, pagnanakaw at pagsira sa mga bahay ng mga Palestino.
“Walang-maliw na tumitindig at nakikiisa ang Salinlahi sa mamamayang Palestino, at kinikilala na ang pakikibaka ng mga batang Palestino ay hindi hiwalay sa pakikibaka ng mga batang Pilipino. Nananawagan kami sa agarang pagtigil sa henosidyo, ang tuloy-tuloy na pagpapapasok ng ayuda, ibalik ang lupa ng mga mamamayang Palestino at pananagutan sa lahat ng mga kriminal na responsible sa mga kahindik-hindik na mga krimen,” pahayag ng Salinlahi.
