Nagadamgo sang kaudtohon si Maj. Gen. Michael Samson sang iya ginpahayag nga “wala na sang aktibong larangang gerilya sa isla sang Negros.”
Madumduman nga sang nagligad nga tinuig pa pasulit-sulit nga nagahambal ang Armed Forces of the Philippines (AFP) nga wasakon ang armadong paghimakas sa isla apang nagakadunlan ini sang kaugalingon nga tinaga sang may mga aksyon militar nga ginalunsar ang mga yunit sang NPA sa isla.
Sa likod sang mga pagparada sang AFP sa ila kuno mga kadalag-an sang nagligad tuig kag sa subong nga deklarasyon amo ang pagtabon sang matuod sini nga tinutuyo—ang pagbukas sang isla sang mga maki-dumuluong nga proyekto para sa interes sang mga imperyalistang pungsod kag mga kahimbon sini nga lokal nga mga agalon mayduta kag burukrata.
Bangud sini, wala untat nga militarisasyon kag indi matago nga mga pagpanglapas sang tawhanon nga kinamatarung sang AFP ang nagakalatabo sa mga komunidad sang mga mangunguma tubtob subong.
Partikular sa South Central Negros, halos apat ka bulan na nga naga-operasyon ang nagabulos-bulos nga tropa sang 94th IB upod ang CAFGU kag mga traydor sa rebolusyon sa mga nabukid nga bahin sang mga barangay sang Buenavista, Mahalang kag Carabalan, sakop sang Himamaylan City; mga barangay sang Santol kag Amontay, sa banwa sang Binalbagan kag sa mga barangay sang Orong, Oringao kag Tan-awan, Kabankalan City; tanan sang Negros Occidental.
Gin-okupar sang nasambit nga militar ang mga pang-sibilyan nga mga institusyon kaangay sang barangay hall, eskwelahan, kag simbahan lakip na ang mga kabalayan sang mga mangunguma nga nagatuga sang kahadlok sang pumuluyo sa mga nasambit nga lugar. May mga nareport nga mga kaso sang pagpamatay, pagkastigo, iligal nga detensyon kag interogasyon, pagpasaka sang pato-pato nga kaso kag red-tagging nga ginkomiter sang 94th IB. Masami nga ginapasibangdan ang mga biktima nga may angot sang NPA kag makakuha sang impormasyon angot sa mga ginalagas nila nga mga yunit sang mga Pulang hangaway.
Ang mga nasambit man nga mga lugar sa ibabaw ang may madamuan nga kontra-pumuluyo nga mga proyekto nga magadislokar kag magaguba sang palangabuhian sang mga mangunguma kag tumandok sa lugar. Halimbawa sini, padayon ang pag-opereyt sang mapaniplangon nga “Greening Program” sang UPC Bionergy PH industrial Park II Corp. sa liboan ektarya nga kadutaan sa magkatambi nga mga barangay sang Binalbagan kag Himamaylan City. Ara man ang City Zoning Project sang Kabankalan City nga magapaidalom sang ‘land use conversion’ sang gatusan ka ektarya nga katubuhan kag talamnan pakadto sang ‘residential’ kag ‘real estate’ nga proyekto. Dugang man diri ang pagpatukod sang ₱12-billion tunnel road kag ang Upland Express sa Himamaylan City pakadto sa Tayasan, Negros Oriental kag Kabankalan City.
Ini tanan ginapasiguro sang AFP partikular sang 94th IB kabaylo sang kabuhi sang pumuluyo.
Ang ini nga kahimtangan nagahatag sang paborable nga kondisyon sa dugang nga pagsulong kag pagpabaskog sang paghimakas masa sa nagkalain-lain nga porma.
Subongman, magapadayon ang Romeo Nanta Command-New People’s Army (RNC-NPA) sa pagpatuman sang iya mga rebolusyonaryong hilikuton ilabi na sang paglunsar sang mga taktikal nga opensiba batok sa nagaharing sahi kag iya mga makinarya. Ang armadong paghimakas amo ang solong solusyon sa pagrumpag sa nagaharing sistema nga dala sang salot nga burukrata kapitalismo, pyudalismo kag imperyalismo.
