Binatikos ng mga empleyado ng ilang kumpanya sa Business Process Outsourcing (BPO) sa Cebu ang ipinatupad nitong “business-as-usual” sa kasagsagan at pagkatapos ng lindol na yumanig sa prubinsya noong Setyembre 30. Tumama ang 6.9 magnitude na lindol sa hilaga ng prubinsya kung saan hindi bababa sa 72 ang naitalang namatay. Sunud-sunod rin ang mga aftershock.
Nagsampa ng pormal na reklamo sa Department of Labor and Employment-Regional Office 7 (DOLE-RO7) ang BPO Industry Employees Network (BIEN)-Cebu noong Oktubre 2 para ipaabot ang mga reklamo ng mga empleyado.
Sa loob lamang ng dalawang araw, iniulat ng BIEN-Cebu na nakatanggap ito ng daan-daang reklamo mula sa mga call center agent na isinadlak ng mga kumpanya sa mapanganib na sitwasyon sa gitna ng sakuna.
Kabilang sa mga natanggap ng grupo na ulat ang pamimilit ng mga kumpanya sa mga agent na tumanggap pa rin ng tawag habang lumilindol sa halip na lumikas mula sa mga gusali. Mayroon ding mga kaso kung saan hinarangan ng kumpanya ang mga pintuan palabas para pigilang makaalis ang mga empleyado. Seryosong paglabag ang mga ito sa Occupational Safety and Health Standards na nakasaad sa batas.
Dagdag dito, mayroong mga kaso ng pamimilit sa mga empleyado na bumalik sa trabaho sa kabila ng pakiusap na tumutok muna sila sa kaligtasan at kagalingan ng kanilang mga pamilya sa gitna ng krisis. Imbis na pahintulutang harapin ang krisis dulot ng sakuna, pinadalhan ang mga empleyadong hindi pumasok sa trabaho ng “notice-to-explain”, pinatawan ng mga sangsyon, tinanggalan ng insentibo at benepisyo at iba pang maparusang hakbang.
Giit ng BIEN-Cebu, dapat imbestigahan ng DOLE-R07 ang mga reklamong ito at papanagutin ang mga kumpanya sa kanilang pang-aabuso at kapabayaan. Ayon pa sa grupo, inilantad lamang ng sakuna ang matagal nang suliranin at pang-aabuso ng mga BPO sa mga empleyado nito, at ang kawalan ng kontrol ng gubyerno sa mga pribadong kumpanya.
“Ang kasakiman ng mga korporasyon, katuwang ang kawalang aksyon ng gubyerno, ay nagpapakita ng ganap na pagsasantabi sa kapakanan at kaligtasan ng mga empleyado sa BPO,” ayon kay John Kyle Enero, tagapagsalita ng BIEN-Cebu. Ayon pa sa grupo, malaon nang dumaranas ang mga empleyado sa BPO ng kawalan ng katiyakan sa trabaho at benepisyo, kabayaran sa retirement, mga insentibo at iba pang mga karapatan.
“Itinakwil ng BIEN-Cebu ang kalakarang ‘business-as-usual’ ng mga kumpanya ng BPO at ang kapabayaan ng gubyerno sa panahon ng krisis,” ayon kay Enero. Nanawagan ang BIEN-Cebu sa lahat ng manggagawa sa BPO na magkaisa at labanan anag lantad na pagwawalang-bahala sa mga karapatan ng mga manggagawa.
Ang Cebu ang ikalawang pinakamalaking sentro ng mga kumpanya ng BPO, sunod sa Metro Manila. Sa konserbatibong datos ng Contact Center Association of the Philippines (CCAP), mayroong hindi bababa sa 160,000 empleyado ng BPO sa prubinsya, na bumubuo sa 15% ng kabuuang bilang sa buong bansa.
