Tinambangan ti New People’s Army (NPA)-Bukidnon ti agop-operasyon a tropa ti militar iti Namnam River iti Barangay St. Peter, Malaybalay City, Bukidnon idi Oktubre 24. Tallo ti napatay kadagiti pasista a soldado ken nasamsam kadakuada ti maysa a riple nga R4, vest ken dagiti magasin, pistola, 10 bakpak, dagiti bala ken dadduma pay a suplay.

Naiyaramid ti NPA daytoy a taktikal nga opensiba iti kangitingitan dagiti focused military operations dagiti batalyon ti Armed Forces of the Philippines iti rehiyon. Sakbay daytoy, inatake ti NPA ti tropa ti 26th IB iti Sityo Kimam, Barangay Binicalan, San Luis, Agusan del Sur idi Oktubre 14. Nasamsam dagiti soldado ti uppat a bakpak ken dadduma pay a ramit militar.

Idi Oktubre 22, na-engkwentro ti NPA ti 26th IB iti Barangay Binicalan. Namartir iti nasao a labanan ni Ike Dahonay (Ka Tres). Saan a bumaba iti lima a soldado ti 26th IB ti mapatta-patta a napapatay bayat nga adu pay ti nasugatan, segun iti yunit ti NPA.

Aktibo a depensa. Idiay Masbate, nakapagdepensa dagiti yunit ti NPA-Masbate (Jose Rapsing Command) laban iti gandat a reyd ti AFP iti kampo da iti ili ti Uson ken Baleno idi Nobyembre. Pito a soldado ti naiyulat a napapatay kadagiti aktibo a depensa bayat a pito pay ti nasugatan.

Idi Nobyembre 22, linabanan ti NPA ti 2nd IB iti Sityo Pile, Barangay San Jose, Uson. Nakadepensa met ti yunit ti NPA-Masbate idi Nobyembre 20 laban iti 96th IB iti Barangay Cancahorao, Baleno. Nakemmeg kalpasan ti labanan ti maysa a Nalabbaga a mannakigubat. Nagpanawagan ti NPA-Masbate a respetaren ti karbengan ti nakemmeg kas hors de combat wenno mannakigubat nga awan iti saad a lumaban.

Idiay Oriental Mindoro, pinaay dagiti Nalabbaga a mannakigubat ti panag- atake ti 76th IB ken 203rd IBde laban iti yunit a nakaistasyon iti Sityo Camilian, Barangay Bugtong na Tuog, Socorro idi Nobyembre 18. Dua a pasista a soldado ti rehimen Marcos ti natay iti aktibo a panagdepensa ti hukbo ti umili bayat nga adu ti nasugatan.