Awan pay iti murdong iti ramay dagiti krimen ti gobierno iti Pilipinas ken armado a puersa daytoy ti opisyal nga inpablaak ti kabuklan a sekrataryo ti United Nations ti baro a report maipapan iti kasasaad dagiti ubbing iti armado a risiris iti Pilipinas. Napalalo a kalkalluban ti report ti nadara a rekord ti sigud a rehimeng Duterte ken agdama a rehimeng Marcos. Pinalamanan pay ti report iti “panagraem iti agtultuloy a panangikagumaan ti GRP iti panagsalaknib kadagiti ubbing.”
Basar iti report, adda nailista a 58 nakakaro a kaso a pananglabsing ti karbengan dagiti ubbing nga no sadino ket 43 ubbing ti biktima manipud Enero inggana Disiembre 2023. Iti bassit nga bilang daytoy, sangapulo laeng ti nailista nga inaramid ti Armed Forces of the Philippines (7 kaso), Philippine National Police (1 kaso) ken National Intelligence Coordinating Agency karaman ti National Task Force-Elcac (2 kaso).
Adayo iti kinapudno ti aktual nga kinaadu ti kaso ti pananglabsing ti karbengan dagiti ubbing ti datos ti UN. Ti lista ti Ang Bayan, saan a bumaba iti 486 dagiti kaso ti pananglabsing iti karbengan-ubbing dagiti puersa militar, pulis ken ahensiya ti gobierno iti Pilipinas iti kapada a tawen. Dimmanon iti 112,527 ti bilang dagiti ubbing nga biktima iti pananglabsing daytoy.
Pito kadagiti biktima nga ubbing ket pinapatay, uppat a biktima ti gandat a patayen, siyam ti dinukot, 35 ti inaresto ken imbalud, ken 33 ti pisikal a sinaktan. Maibilang kadagiti pinatay ni Archie Salvador (17) idi Pebreo 11, 2023 idiay Camarines Norte; ti agkabsat nga Fausto (12 at 15) kadua ti ina ken ama idi Hulio 14, 2023 iti Negros Occidental; ken ni Carling Belab (agtawen 17) idi Hunio 16, 2023 idiay Masbate.
Ni Salvador ken Belan ket ibagbaga a mannakigubat ti New People’s Army (NPA) nga natay iti engkwentro. Nairut daytoy nga tinubngar dagiti bumaryo ken kakabagyan. Ti agkabsat nga Fausto ket binabalaw ti BHB iti likod ti natibker nga ebidensia nga minasaker ida ti 94th IB. Kabayatanna, inusar ti AFP ti innala daytoy nga anak dagiti nalabaga a mannakigubat tapno pasukuen ida.
Rinibribu met ti biktima ti panagbomba, panagkanyon ken istraping dagiti puersa ti AFP iti kaaw-awayan iti natroma kadagiti insidente daytoy. Nasurok 13,000 nga ubbing ti nabisinan gapu ti inyetnag nga panangblokeyo ti makan iti nainget nga operasyon kombat. Agsusumbangir met dagiti kaso ti panagkampo ti AFP kadagiti eskuelaan a nakaapekto iti panagadal dagiti ubbing.
Iti umuna nga lista ti Ang Bayan ita nga 2024, adda 417 kaso iti panaglabsing ti karbengan dagiti ubbing dagiti puersa ti estado no sadino ket biktima ti 27,278 ubbing.
Panangsurot ti rebolusyonaryo a tignayan
Nairut a sursuroten ti rebolusyonaryo a tignayan dagiti pagannurutan ti gubat ken internasyunal a makatao nga linteg. Maikaniwas daytoy iti parparuaren iti kapada a report nga 41% iti “nailista” kadagiti kaso ti UN ket inaramid ti NPA. Akakusaran iti report ti NPA ti panagrekrut ken panangaramat ti ubing a mannakigubat, panagpapatay wenno pannakadadael iti ubbing, reyp ken sekswal a pananggundaway ken panagdukot.
“Kayatmi a talmegan nga ti National Democratic Front of the Philippines (NDFP) ken ti sibubukel a rebolusyonaryo a tignayan ket nairut a mangitantandudo ken mangsalsalaknib iti karbengan dagiti ubbing iti amin nga aspeto ti pannakidangadang,” sungbat ni Ka Coni Ledesma, Pangulo ti Special Office for the Protection of Children, iti report ti UN.
Basar kenni Ledesma, nalawag a nakalanad daytoy iti Program of Action and Declaration on the Rights and Welfare of Children ti nairut nga panangiparit iti panagrekrut kadagiti ubbing a nababbaba iti 18 ti tawen na tapno agbalin a nalabaga a mannakigubat. “Dagiti prinsipyo nga nakalanad ditoy ket maiyannurot, ken masansan ket nalablabes pay, kadagiti basaran nga inkeddeng ti international a makatao nga linteg,” innayon ni Ledesma.
Nakalanad met a maiparit iti panagrekrut iti menor de edad a mannakigubat iti pagannurutan ti Partido Komunista iti Pilipinas manipud pay 1988, maysa a tawen sakbay a binukel ti UN Convention on the Rights of Child.” Dagitoy a pagalagadan ket nairut a sursuroten dagiti yunit ti NPA kadagiti larangang gerilya ken lokal nga organo ti bileg pampulitika ti intero a pagilian,” panangitalmeg ni Ledesma.
