Gihukmang sad-an sa mga korte sa Puerto Princesa ug Brooke’s Point sa unum ka tigpanalipud sa tawhanong katungod sa kasong illegal possession of explosives and explosive devices ug rebelyon sa milabayng mga semana. Sumala sa grupo sa tawhanong katungod, dili makatarunganon ang silot nga reclusion perpetua o tibuok kinabuhi nga pagkabilanggo sa unum ug dayag kining pagyatak sa hustisya.

Ang mga aktibista, nga kabahin sa gitawag nga Palawan 7, giaresto niadtong Oktubre 4, 2019 sa usa ka tsekpoynt sa Sityo Anilawan, Barangay Babuyan, Puerto Princesa City. Ang pito nga giaresto mao silang Antonio Molina, organisador sa KASAMA-Timog Katagalugan; Bener Rimbunan ug Awing Lumpat, mga katutubong Palaw’an; Glendhyl Malabanan, kanhing general secretary sa Karapatan ST; Ronces Paraguso ug Jenny Bautista, mga istap sa Karapatan-ST; ug si Joemelito Tanilon, organisador sa Pamalakaya-Palawan. Si Molina namatay sa detensyon tungod sa atake sa kasingkasing niadtong Nobyembre 2021.

Nagplano nga mag-apela ang Palawan 6 sa ilang kaso. Nanawagan usab ang mga grupo sa tawhanong katungod nga ibasura ang uban pang mga kaso nga gipasaka batok sa mga biktima ug hinanali silang buhian.