Gisugdan niadtong Disyembre 4 ang walay kinutuban nga kinatibuk-ang welga sa mga mamumuo sa South Korea ubos sa Korean Confederation of Trade Unions (KCTU) isip tubag sa deklarasyon sa balaod militar sa presidente sa nasud nga si Yoon Suk-yeol. Mikabat sa 1.2 milyong mamumuo ang myembro sa KCTU, ang pinakadakung pederasyon sa mga unyon sa nasud.

Ang pagpatuman sa balaod militar usa lamang ka taktika ni Yoon Suk-yeol aron pugson ang katawhan ug magpabilin sa pwesto taliwala sa nagkagrabeng krisis sa pulitika, sumala sa KCTU. Gipasangil ni Yoon ang “pagbuntog sa mga pwersang pro-North Korea” ug “pagpreserbar sa konstitusyunal nga kahapsay” aron ipatuman kini. Apan sumala sa KCTU, palusot lamang kini ni Yoon aron palugwayon ang iyang kaugalingon sa gahum tungod kay anaa siya sa disbentahe. Pipila na ka bulan nga giatake sa krisis ang administrasyon ni Yoon, nga nag-atubang sa 22 ka reklamong impeachment, ug dugang 10 nga wala pa napasaka. Gikasilagan ang iyang administrasyon tungod sa kontra-mamumuo nga mga palisiya ug pagkaitoy sa imperyalismong US.

Ipadayon sa mga mamumuo ang ilang welga hangtud dili mokanaog sa pwesto si Yoon.