Kasla narungsot nga aso a napalubusan dagiti pulis a nangraot iti natalna a panagbantay dagiti masa. Iggem dagiti kalasag ken batuta, pinagngarietan da a binurak dagiti ima-ima ken awan gaway a lallakay, babbaket ken agtutubo a nagbarikada nga umili tapno saan a makaserrek ti kumpanya a Woggle a mangdadael iti daga a pagnanaedan ken paggapuan ti pangkabiagan da.

Nalawag kadagiti agindeg ti kinapateg ti tunggal paset ti kadagaan nga inda pinadur-as iti naunday a panawen nga uray awan inburay a tulong ti reaksyunaryo a gubyerno. Nalawag kadakuada a ti daga a pagtaktakderan ket kasilpo ti anges ken biag a tinawid manipud kadagiti naglukat a nagrigat a nangpadur-as tapno makapataud iti makan ken agtultuloy a pagnumaran dagiti sumarsaruno pay a kapututan. Isu ngarud nga inpamaysa da ti panangtaripato, panangaywan ken panangipateg da gapu ta ammo da nga uray bassit laeng a paset ti madadael ket dakkel a taktak kadakuada.

Nalawag met laeng kadakuada ti nakapay-an dagiti residente nga adda iti asideg ti pagminasan iti dadduma pay a paset ti Nueva Vizcaya ken dadduma pay a pagminasan iti rehiyon ken intero a pagilian. Naimatangan da ti nakas-ang a buya ti kabambantayan iti ili ti Runruno a gapuanan ti makadadael nga panagmina ti kabsat met laeng a kumpanya ti Woggle. Nalawag kadakuada ti nalidem a maipaay iti biag ken kabiagan dagiti kemikal a mausar iti panagmina a rugi iti pannakatay saan laeng kadagiti kayu, karaman pay a madadael dagiti adu a waig a nangtaraken ti adu nga lames ken makmakan.

Isu a nalawag kadakuada a kasapulan ti tumakder a natibker. Awan sabali a sarraked dagiti taga-Bitnong nu saan a ti bukod da a pigsa babaen ti nairut a panagkaykaysa. Kasapulan a patibkeren ti organisasyon, irussuat dagiti paggaadal tapnon masimpuon ti gapu nu apay mapukawan karbengan dagiti mannalon nga agtagikua ti daga uray mataripato a naimbag, idinto ta nakalaklaka nga maiyawat kadagiti ganggannaet tapnon pagkuartaan ken dadaelen laeng.

Sumalsaludo ti NPA-Cagayan Valley iti kinatibker ti umili a lumablaban. Saan laeng a pannakisaranget dagiti Novo Vizcayano laban kadagiti ganggannaet a makadadael a panagminas, nu di ketdi laban daytoy ti umili iti Tanap ti Cagayan ken intero a pagilian. Kasilpo daytoy ti kabuklan a laban iti bulok a sistema a pakaibilangan ti burukrata kapitalismo, nu sadinno nga agum-umok dagiti negosyante-pulitiko ken ti gubyerno a korap nga akin-gappuanan nu apay madadael ti kabambantayan, nu apay a mapukawan karbengan dagiti mannalon nga agtagikua ti daga, nu apay nga agrigrigat ti nalawa nga umili iti tengnga’t kinabaknang ti Pilipinas.

Awan manamnama iti agdama a sistema a nagpupunipunan dagiti tallo a ramut a mangparparigat iti nalawa nga umili – sallukob ti imperyalismo, burukrata-kapitalismo, pyudalismo. Ususaren ti agruprupsan nga estado ti ranggas laban kadagiti umili a lumablaban. Sungbat ti reaksyunaryo nga gubyerno kadagiti lehitimo nga panaglaban ti umili ti ranggas militar babaen kadagiti berdugo ken pasista nga AFP ken PNP. Nalawag a makita nu siasinno ti pagserserbian ti armado a pwersa ti estado. Nakadisenyo ti pannakaitakder ti AFP-PNP nga agserbi iti interes ti imperyalista nga US, dadakkel a burgesya kumprador ken apo’t daga. Isuda ti mangsigurado a malapdan ti panaglaban ti umili, mapaulimek dagiti maidaddadanes a mannalon, mangdangran kadagiti kumontra iti makapatay a programa ken proyekto ti estado ken mangpapatay kadagiti lider nga umasassibay ken tumaktakder iti sangoanan dagiti umili a lumablaban.

Maymaysa laeng ti pudpudno nga hukbo ti umili a mapangnamnamaan ken makakuyog da a lumaban. Awan sabali a pagsanggiran ti umili a lumablaban nu saan a ti rebolusyonaryo a tignayan. Awan sabali a pamuspusan tapnon maparmek ti armado a pwersa nga AFP-PNP a pannakaduri dagiti agari-ari a dasig nu saan a ti armado a pannakidangadang. Awan sabali a solusyon tapnon magibusan ti panagrigrigat ti nalawa nga umili: kasapulan a papigsaen ti New People’s Army (NPA) ken irussuat ti naunday a gubat ti umili a mangrippuog iti agdama a sistema a malapyudal ken malakolonyal babaen ti demokratiko a rebolusyon ti umili nga addaan iti sosyalista a perspektiba.

Umili agarmas!

Rippuogen ti pasista a turay!

Itakder ti Gubyerno ti Umili!

Sumampa iti New People’s Army!