Ang petsa Hunyo 12 ang adlaw sang ika-128 ka tuig nga pagdeklarar sang US sa Pilipinas sang peke nga kahilwayan. Ang pumuluyong Pilipino padayon nga ara sa kontrol sang mananakop nga Amerikano sadto tubtob subong. Ang matuod gin-into lamang ang pumuluyong Pilipino nga maisog nga nagahimakas batok sa mapanghimulos kag mapiguson nga pagpanakop sang mga dumuluong halin pa sa kolonyalistang Espanyol, Amerikano, Hapon kag liwat nga pagbalik sang Imperyalistang Estados Unidos para muklat nga punggan ang hugot nga pag-ululupod sang mga rebolusyonaryong Pilipino sa armadong paghimakas sadto nga ginpangunahan ni Gat Andres Bonifacio. Amo nga gintukod sang Estados Unidos ang mga papet nga mga rehimen nga amo ang nagapatuman sa mga dikta sini kag mga programa kag nagapasiguro nga mapabilin ang kontrol sini sa pungsod Pilipinas.

Gani, ang peke nga kahilwayan nga gindeklara sang imperyalistang Amerikano para sa mga Pilipino ang nagamanipestar sa halos 80 man ka tuig nga nagpabilin sang labi nga pag-antus sang kadam-an nga pumuluyong Pilipino. Direktang mabatyagan ang padayon nga kontrol nila sa pang-ekonomiya, pulitika kag militar paagi sa mga nagkalain-lain nga mga kasugtanan, tradado kag iban pa nga mga polisiya nga ila gina-imposar sa Pilipinas.

Sa patag sang ekonomiya, ginakontrol ini sang US paagi sa neoliberal nga polisiya sa dagway sang liberalisasyon, pribatisasyon, deregulasyon kag rekonsentrasyon sa mga kadutaan sa pungsod. Mas ginaabli sang US ang pungsod Pilipinas para sa mina, dugang monopolya sa duta sa dagway sang ‘hacienda system’ kon diin ginatanom ang mga pang-export nga produkto, kag subong sa pag-arkila sa mga dumuluong sang aton duta tubtub sa 99 ka tuig. Nagaserbi ini tanan sa interes sang US kag iban pa nga mgs alyado sini.

Sa pulitika, padayon nga nagasunod-sunod ang reaksyonaryong estado sa dikta sang US ilabina sa pagdesisyon kon sin-o ang maglingkod sa matag-as nga mga posisyon sa panggobyerno. Subongman, sila ang nagamando kon ano nga mga polisiya ang ipatuman sa pungsod nga nagapabor sa dalagku nga komprador burgis kag dalagku nga agalon may duta kag sa ila amo nga Estados Unidos. Subongman, mayorya sa mga senador kag mga congressmen ang nagaduso sang interes sang US kag nagapatalang sa pumuluyo kaangay sang mga pulitiko halin sa blokeng Liberal, Akbayan. kag iban pa  nga ‘social democrats’ nga nagapakunokuno nga  “maki-pungsod kag makamasa.”

Sa militar, nahigot sa mga indi makatarunganon nga mga kasugtanan militar ang pungsod. Halimbawa sini ang padayon nga pagpatuman sang EDCA kag VFA. Padayon man nga ginahiwat sulod sang aton teritoryo ang mga war games kaangay sang Balikatan 2026 kag Salaknib nga  tumong mahanas ang AFP sa pagpahipos sa pumuluyong nagahimakas kag sa matuod nga soldado nila. Subong, nagsulod naman ang reaksyonaryong gobyerno sa ‘Pax Silica’ nga nagalapas sang aton soberanya kag nagabutang sa peligro sa kabuhi sang mga sibilyan.

Kalakip sini ang nga pagpangamkam sang US sang 1,620 hektaryas sa Tarlac kag Pampanga nga buot himuon nga economic security zones sang US kag mga kahimbon nga CEOs sang dumuluong nga kompanya nga hilimuan sang mga bala, armas, drone kag iban pa.

Sa kabilugan, ang LPC-NPA upod sa rebolusyonaryong pwersa sa absoluto nga pagpamuno sang Communist Party of the Philippines hugot kag lig-on nga nagapanindugan nga maangkon lamang ang lubos nga kahilwayan sa pungsod kon mawasak ang mala-kolonyal kag malapyudal nga sistema paagi sa malaparan nga paghiliusa sang pumuluyo sa pagpa-abante sang demokratiko nga rebolusyon sang banwa paagi sa pangmalawigon nga inàway banwa.

Pasingkion ang inaway banwa!
Pasistang militar, layas!
Palayason ang base militar sang US!
Imperyslistang US, layas sa Pilipinas!