Nakikig-usa an mga rebolusyunaryo nga pwersa ha Eastern Visayas ha mga nasyunal nga protesta nga iglalansar yana nga adlaw nga nasukna ha ngatanan-nga-gapil ngan bagakolonyal nga pagluob han imperyalismo nga US ha Pilipinas. Kaparte hira han hiluag nga ranggo han katawhan Pilipino nga tinuod nga nag-iinsister han nasyunal nga katalwasan ngan soberaniya. Sugad nira, gin-iinsister han Partido, Bagong Hukbong Bayan ngan mga rebolusyunaryo nga organisasyon ha Eastern Visayas nga diri pa tinuod nga talwas an mga Pilipino ha ilarum han katilingban nga bagakolonyal ngan bagapyudal, ngan kinahanglan ini hul-os nga rumkon pinaagi han gerra han katawhan agud dad-on an nasud ha dalan han tinuod nga kagawasan ngan kamurayawan.
An “katalwasan” nga kada tuig ginhahandum han kada papet nga rehimen kada Hunyo 12 buwa ngan waray pulos para ha mga ordinaryo nga Pilipino. Padayon nga naluludlod an katawhan ha kakablasan, kawaray hustisya ngan pagtamak ha mga katungod. An tinuod nga talwas la amo an dagko nga agaron maytuna, kumprador burgesya, ngan burukrata kapitalista nga waray wantas ha pandambong ha natural nga karikuhan, pondo ngan kusog-pagtrabaho han katawhan. Tungod kay gin-uundong nira an mga palisiya nga pabor ha langyaw nga buwitre, an paghahari ngan pangongorap nira ha pondo han katawhan gintutugutan ngan ginbebendisyunan han imperyalismo nga US.
Ha ilarum ni Marcos Sr tubtub kan Marcos Jr, dirudiretso an pagbasura han mga papet nga rehimen ha soberaniya han nasud. Labina kan Marcos Jr, nag-agsub ngan hiniluag pa an sulod-gawas han mga langyaw nga tropa labina han US. Traydor niya nga gin-abre an nasud ha gatus-gatos nga war games ngan pagpapatrulya ha dagat, ha pagtitindog han mga dayag ngan sikreto nga base militar, pagpapapusisyon han mga armas ngan higamit ha gerra, ngan pagbuhi han misayl tikang ha sibilyan nga airport agud himubo nga lumupad ha igbaw han mga sibilyan nga komunidad nga nahibutang ha peligro—ngatanan ini nagdadanas ha mga Pilipino ha ipo-ipo han imperyalista nga gerra ha Asya-Pasipiko. Bisan ano nga “relief” o ayuda, sugad han ginpanhatag han 8th Infantry Division ha mga parupangisda nga nawarayan hin panginabuhi tungod ha Balikatan, diri matatago ini nga kamatuoran.
Ginsurender liwat ni Marcos an mga importante nga mineral ngan eruektarya nga katunaan han nasud agud dambungon han mga kompaniya nga Amerikano ngan gamiton ha manupaktura han mga higamit pan-gerra ha ilarum han kasarabutan nga Pax Silica ngan programa nga Luzon Economic Corridor. Ha Eastern Visayas, ginpapaspas han rehimen Marcos an Samar Unity Roads Project, usa nga proyekto nga pangalsada nga natahos ha riko nga kagugub-an han Samar, ngan ginlalauman nga magpapadagmit ha pandambong han mga langyaw nga kompaniya ha mga deposito han bauxite, chromite, nickel ngan iba pa nga mineral ha rehiyon. Hin-o man nga tumipa, pinaagi man han armado nga pag-ato o diri, madarahug nga ginpupuypoy. Kalakip dinhi an ginlansar hini nga naglabay nga mga kontra-insurhensiya nga pagpahiara han mga langyaw ngan lokal na pasista nga tropa ha mga komunidad han parag-uma ngan parupangisda, nga nagtartarget ha mga armado nga rebolusyunaryo nga grupo sugad han BHB.
Komo numero uno nga terorista, an sugad hini nga pagtamak ha katalwasan han mga soberano nga nasud ginhihimo liwat han imperyalismo nga US ha magkalain-lain nga nasud. Ini an ginhihimo nira yana ha Iran, Venezuela, Colombia, Bolivia, ngan Cuba. Ini an ginhimo nira hadto ha Vietnam, Nepal, Nigeria, China, Indonesia, ngan damo nga iba pa. Sa pagpintas han panginginlabot ngan pasista nga panmuypoy han US hini nga mga katawhan, mas naglalarab an patriyotiko nga diwa han katawhan. Nahatag-inspirasyon ini ha katawhan Pilipino ha kalugaringon nga pakigbisog para ha nasyunal nga katalwasan ngan demokrasya.
Hilaba pa an dalan nga hahasugon han katawhan Pilipino para makab-ot an tinuod nga katalwasan. Andam an katawhan han Eastern Visayas nga hasugon an rebolusyunaryo nga dalan han katalwasan tikang ha langyaw nga parupanalumpigos, anuman nga liko ngan birik pa an agian.
