Sinagot ng matinding pagbatikos ng mga mamamayan sa buong mundo ang iligal na pagpasok ng mga pwersang Israeli sa mga barko ng Global Sumud Flotilla (GSF) noong Oktubre 1-2 bago makarating ang mga ito sa Gaza. Inaresto ng mga sundalo ng Zionistang estado ng Israel ang 450 katao mula sa higit 40 bansa, na sakay ang ilampung barko para maghatid ng ayudang pagkain at iba pang pangangailangan sa mamamayang Palestino na biktima ng henosidyo.
Kabilang sa inaresto ang kilalang aktibistang pangkalikasan na si Greta Thunberg at Mandla Mandela, apo ni Nelson Mandela, ang bantog na lider na lumaban sa apartheid sa Africa. Ayon sa mga organisador ng GSF, ang panghaharang ng Zionistang Israel sa kanilang mga barko ay isang akto ng “pirasiya” sa karagatan, at atake sa “di-armadong humanitarian” sa international waters, labag sa freedom of navigation at mga international humanitarian law. Tinawag nilang “pagdukot” ang iligal na pagdampot sa kanila ng mga Israeli at agad-agad na deportasyon nang walang abugado o proseso.
Ang GSF ay binubuo ng humigit-kumulang 40-44 na maliliit na sasakyang pandagat na nagsimulang maglayag mula sa mga daungan ng Spain, Italy, Tunisia, at Greece noong Agosto. Dala nito ang ilang toneladang pagkain, gamot, at mga pangunahing pangangailangan para sa mga Palestino sa Gaza. Kasama sa sakay ng mga barko ang mga duktor, abugado, at parlamentaryo, na tinitingnan ang misyon bilang isang di marahas na pagtindig laban sa henosidyo ng Israel sa Gaza.
Sabay-sabay na pinasok ang karamahin sa mga barko ng GSF habang 70 nautical mile mula sa baybayin ng Gaza. Ginamitan ito ng mga water cannon at sinalakay ng mga sundalong armado ng malalakas na sandata. Ang nakalusot na sasakyan, ang Marinette na may dalang anim na aktibista, ay hinarang ng mga pwersang Israeli mga 42.5 nautical miles mula sa Gaza noong Oktubre 3. Doon nagtapos ang flotilla.
Habang naglalayag, kunwa’y nagpadala ng “escort” na mga barko ang mga gubyerno ng Spain at Italy para “ihatid” ang flotilla. Pero bago pumasok sa teritoryong pandagat ng Gaza, duwag itong tumigil at bumalik sa kanilang mga bansa para umiwas sa isang “insidenteng diplomatiko.” Nagtangka pa ang mga pwersang nabal ng Italy na hikayatin ang mga kalahok ng GSF na itigil na ang paglalayag at sumama na lamang sila pabalik sa Italy. Nagpadala naman ng mga drone ang Turkey hanggang pasukin ng mga Israeli ang mga barko ng GSF pero wala itong ginawang hakbang.
“Hindi ito ang katapusan… Magpapatuloy kaming maglalayag hanggang mapalaya ang Gaza,” deklarasyon ng mga organisador ng GSF. Inanunsyo nila ang paglalayag sa hinaharap ng mas malaki pang flotilla na lalahukan ng 1,000 barko.
