Inanunsyo ng Department of Migrant Workers (DMW) noong Agosto 22 na itataas sa US$500 (halos ₱28,000) ang minimum na sahod ng mga Domestic Helpers (DH) o mga Pilipinong kasambahay mula sa US$400 (₱22,000). Ang US$400 na sahod ay itinakda noon pang 2006 sa ilalim ng Philippine Overseas Employment Administration Governing Board Resolution No. 5.
Ang Pilipinas, sa pamamagitan ng DMW, ang nagtatakda ng sahod para sa mga DH, saan man silang bansa nakaempleyo, at hindi ang bansa na kumukuha ng kanilang serbisyo. Ayon sa datos ng gubyerno, nasa 85,645 ang nagtrabaho bilang DH sa taong 2024. Gayunpaman, saklaw lamang nito ang mga DH na dumaan sa POEA.
Ang dagdag na sahod ay bahagi ng mga reporma ng DMW. Kabilang dito ang “know your employer”, mandato na dapat makapag ‘video conference’ muna ang amo ng DH bago ito bumyahe at “Kamusta Kabayan” isang sistema ng pagmonitor sa kalagayan ng mga Overseas Filipino Worker gamit ang isang mobile application.
Ayon sa grupong Migrante International, karapatan ng mga OFW ang makatanggap ng nakabubuhay na sahod. Subalit sagka pa rin hanggang ngayon ang paparaming mga kaso ng hindi pagsunod ng mga employer sa nakasaad sa kontrata. Dagdag dito, umiiral pa rin ang pagbabayad ng mas mababang sahod at ilang buwang walang sahod na laganap sa maraming bansa sa Middle East at Asia. Ilang libo nang DH ang umuwi na lamang na hindi nabarayan ang kanilang sahod.
“Matagal na ang problema na ito, pero sa kabila ng kanilang anunsyo, walang nagagawa ang DMW para itaguyod ang karapatan ng ating mga DH o kasambahay,” pahayag ng Migrante International.
“Ang nararapat ay itaas ang sahod sa Pilipinas. Kailangang abutin ang ₱1,200 nakabubuhay na sahod. Kung ang sahod sana dito sa Pilipinas ay nakabubuhay, hindi mapipilitan ang mga Pilipino na mangibang-bayan,” dagdag ng grupo.
