Madinalag-on nga nalunsar sang isa ka yunit sa Romeo Nanta Command-NPA ang ambush batok sa mga naga-operasyon nga tropa sang 94th IB kag CAFGU upod ang mga traydor sa rebolusyon sa Sityo Balao, Barangay Tan-awan, Kabankalan City. Natabo ang opensiba mga 4:00 sang hapon sadtong Setyembre 4, 2025 nga nagresulta sa 3 ka kaswalti sa hanay sa kaaway. Lakip sini si Rejie “Camille” Palata nga nangin aktibo nga CAFGU sa ulahi, nga masupog nga nagapamahug sa pumuluyo panahon sa ila operasyon sa sakop sang Barangay Tan-awan kag Carol-an. Dugang diri, nakilal-an man ang isa pa gid ka traydor nga si Dulon “Suyo” Andres nga nag-upod man sa amo nga operasyong militar.
Pilit man nga ginhinabonan sang 94th IB ang matuod nga isip sang ila kaswalti ilabina sang pagka-imbolbar sang mga traydor sa rebolusyon nga gingamit isip ido nga manug-ayam sang AFP. Ini nga mga indibidwal ang suspek sa kinawatay sang kasapatan kag iban nga propyedad sa mando man sang 94th IB.
Sa kahuy-anan nga naagum sang amo nga militar, patarasak ini nga nagpinalupok sang halos malapit 2 ka oras sa bisan diin nga direksyon lakip na ang mga kabalayan nga nagtuga sang kahadlok kag pagbakwit sang 480 indibidwal sa 116 ka bubong sa tatlo ka magkatambi nga Sityo Palawis, Balao, Alambihod tanan sakop sang Barangay Carol-an, Kabankalan city.
Sa pihak sini tanan, tawhay nga nakamaniobra ang tropa sang RNC-NPA.
Ini nga taktikal nga opensiba ang konkretong sabat sang NPA sa masobra 3 ka bulan na nga pagterorisa sang tropa sang 94th IB kag CAFGU upod sa mga traydor sa rebolusyon sa mga barangay sang Oringao, Tan-awan, Orong kag Carol-an, sakop gihapon sa amo nga syudad. Pamatuod man ini nga ang lupok sang armas sang mga pulang hangaway ang magahatag sang hustisya sosyal kag magahilway sang bilog pumuluyo.
