Tinakderan dagiti residente ti Barangay Sulita, Catubig, Northern Samar a maysa a sibilyan ni Jerick Jugal, maysa kadagiti parparuaren ti 20th IB a natay daytoy iti serye ti armado nga engkwentro ti NPA iti ili ti Catubig idi Nobiembre 5.
Agpanpanawagan da ti imbestigasion ken hustisya ti pannakatay ti biktima. Basar iti karruba ni Jugal, maysa a responsible nga anak ken isuna laeng ti agbirbiruk ti pagbiag para iti pamilya.
Kalpasan ti ibagbaga da nga engkwentro, nagreklamo met dagiti residente ti Barangay Sulitan ken kabangibang a komunidad gapu iti intinnag a panagirut dagiti soldado. Saan da ida a palubusan a makapan kadagiti pagtatalonan tapno agtrabaho ken maiparit ti uray ania ti panangiserrek ti makan iti komunidad.
Kabayatan na, nailista idiay Guihulngan City, Negros Oriental ti serye dagiti pananglabsing ti karbengan-tao ti 62nd IB.
Idi Nobiembre 5, sinerrek ti 16 soldado ti balay ni Loring Geronimo idiay Sitio Ponong, Barangay Trinidad. Birbiruken da ti asawa ken anak na, tinutukan isuna ken ti apoko na ti nangato a kalibre ti paltog ken impauneg ti amin a miyembro ti pamilya ti naulpit nga pananginteroga. Ti dayta met la nga aldaw, iligal a sinerrek dagiti soldado a di nagpakada ti balay ni Helen Bardok idiay Barangay Binobohan kabayatan nga adda isuna iti trabaho.
Idi Nobiembre 8, binugbog dagiti soldado ti 62nd IB ti 38 ti tawen na a mannalon nga ni Boyet Ospar idiay Sitio Manlibod, Barangay Trinidad. Nailista met iti napalabas a lawas iti iligal nga okupasyon ken panagkampo dagiti soldado kadagiti eskuelaan kadagiti barangay iti Guihulngan City, Vallehermoso ken Canlaon City. Ti panagkampo kadagiti pasilidad ti sibilian ket nakaro a pananglabsing iti international a makatao a linteg.
Panangagum ti daga. Linipit ken ginandat da manen a patakiasen dagiti puersa ti estado ken pribado a guardia dagiti residente ken mannalon idiay Barangay Viga, Angadanan, Isabela. Ag-agumen ti pamilia Gamboa ti 23.6 ektarya a daga nga 50 tawenen a suksukayen ken pagnanaedan dagiti mannalon a miembro iti Panagkaykaysa ti Mannalon a Maag-agawan ti daga (Pumalag). Napanan ida ti hepe ti pulis ken administrador ti ili iti Angadanan idi Oktobre 30 tapno piliten a makipag-areglo kadagiti Gamboa. Al-allukuyen ida ti pasuksok a kuarta tapno pumanaw da iti lugar.
Nagsubli manen ti hepe ken dua pay a pulis idi Nobiembre 2 tapno ipasamsam kadagiti pribado a guardia ken puoran dagiti plakard ken istrimer dagiti mannalon. Idi nagbinnara dagiti residente ken pulis, immasut ken nangtutok ti paltog ti hepe ken pulis. Tallo a mannalon ti inaresto. Nagpangta dagiti guardia nga dadaelen dagiti mula dagiti mannalon.
