5, iligal nga gin-aresto sa nagligad nga mga semana

Ang Bayan
December 21, 2024

Asud-asod ang mga kaso sang iligal nga pagpang-aresto subong nga bulan sang Disyembre. Wala nakaluwas sa brutal nga pasistang pagpanumpo sang rehimen US-Marcos bisan ang mga tigulang kag nagamasakit.

Sa Iloilo City, gin-aresto sang mga pwersa sang estado ang 74-anyos nga nagamasakit nga si Tomas Dominado kag upod niya nga tig-atipan sadtong Disyembre 5 sa Barangay Sooc, Arevalo, Iloilo City. Ginapasibangdan siya sang mga kaso nga pagpatay kag rebelyon nga isa ka dekada na nga ginpasaka sa korte. Ginpasakaan naman sang illegal possession of firearms and ammunition, kaso nga “terorismo,” kag mga kaso nga pagtago sa nagapanguna nga akusado, kag obstruction of justice ang iya nga upod.

Si Dominado ang naka-agum sang stroke sadtong nagligad nga tuig, nagahigda na lang sa katre kag nagasalig lang sa naga-atipan sa iya para makagiho gamit ang wheelchair. Nagabatyag siya sang atlapresyon, heart enlargement, neurological deficits, kag iban pa nga seryoso nga isyu medikal kag ang pagbilanggo sa iya ang makapalala sa iya kahimtangan.

Sa Olonggapo City, gin-aresto sang mga pulis ang isa ka tigulang sadtong Disyembre 7 sa Barangay Gordon Heights sa pasibangod nga siya si Prudencio Calubid, isa ka anay kumander sang Bagong Hukbong Bayan. Suno kay Marco Valbuena, upisyal sa impormasyon sang PKP, indi si Calubid ang gin-aresto, nga sadto pang 2006 siya gin-abdak kag gindula sang mga ahente sang militar. Ang pag-aresto sa tigulang ang maathag nga pagkuha lang sa ₱7.8 milyon nga patong sa ulo ni Calubid.

Sa Quezon, gin-aresto ang nagapangkopra nga si Ronilo Villanueva kag isa pa ka ginahingalanan nga “Genero” sa Barangay Guinhalinan, San Narciso sadtong Disyembre 12. Antes sini, napilasan sa tiil si Villanueva sang luthangon sang mga soldado sang 85th IB.

Sa Negros Occidental, gin-aresto sang ginkombinar nga pwersa militar kag pulis sa pagpanguna sang 79th IB ang 58-anyos nga babaye nga si Melba Gabriel sa Sityo Malig-on, Barangay Bandila, Toboso sadtong Disyembre 14. Ginpasibangdan siya sang mga pwersa sang estado bilang isa ka “yabi nga lider” sa BHB kag ginpasakaan sang kaso nga pagtilaw nga pagpatay.

Pag-abdak. Ginbalita kasan-o lang sang BHB-Sorsogon ang kaso sang pwersa nga pag-abdak kag likom nga pagbilanggo sang mga pwersa sang estado kay Gerald Gestole (Ka Chris), hangaway sini nga nagapabulong. Gin-abdak siya sadtong Nobyembre 17, alas 4:30 sang hapon sa pradahan sang traysikol sa Barangay Crysanthemum, San Pedro, Laguna.

Pagpaniro. Ginpaulanan sang bala sang mga soldado sang 94th IB ang balay sang mangunguma nga si Jesse Talaban samtang wala siya sa Barangay Buenavista, Himamaylan City sadtong Disyembre 12. Iligal man nga ginsulod kag ginpang-abukay sang mga ini ang balay.

Kakasanay sa Nexperia. Apat ka upisyal sang Nexperia Philippines Inc. Workers’ Union-NAFLU-KMU, lakip ang presidente sini, ang ginkakas sang kumpanya sadtong Disyembre 17. Ang iligal nga pagkakas ang balos sang kapitalista pagkatapos sang pagpasaka sang mga mamumugon sang “notice of strike” sadtong Disyembre 10 pagkatapos ang isa ka tuig na nga pag-atrasar sang kumpanya kag deadlock sa negosasyon para sa bag-o nga CBA. Nagboto ang 1,195 ka mamumugon nga pabor sa welga sadtong Disyembre 20. Suno sa unyon, gingamit sang kapitalista ang pasibangod nga “pag-upang” sa pagsulod-gwa sang mga produkto sa kumpanya para kakason sila.

Demolisyon. Sadtong Disyembre 10, may yara sang pamahog nga demolisyon batuk sa 47 ka kabalayan sa Dalat, San Roque, Davao City. Suno sa mga residente, naghalin sa upisina ni Atty. Elisio Braganza ang pamahog sang pagpalayas sa ila. Sa amo man nga adlaw, nagpadulong sa komunidad ang mga tinawo sang lokal nga gobyerno, sa partikular halin sa City Engineering Office.