Nagdaog ang mamalitha nga si Alfonso Tomas “Atom” Araullo sa kaso nga sibil nga ginpasaka niya batuk sa mga tinawo sang National Task Force-Elcac nga sila ni Lorraine Badoy-Partosa kag Jeffrey Celiz tungod sa Red-tagging sang mga ini. Ginapabayad sila ni Badoy kag Celiz sang kabilugan nga ₱2.08 milyon bilang danyos sa perwisyo nga tuga sang ila nga aksyon kay Araullo. Gintiglawasan siya sa korte sang mga abogado halin sa Movement Against Disinformation.

Ginpasaka ni Araullo ang nasambit nga kaso sadtong Septyembre 2023 kaangot sa wala untat nga pagpang-guba kag pagpalapta sang kabutigan sang duha sa ila nga programa sa telebisyon sang SMNI kag social media. Sa kaso nga ginpasaka, ginhambal nga ginlapas sang duha ang kinamatarung ni Araullo nga nagpadulong sa seryoso nga pagkaguba kag kahalitan sa iya nga reputasyon, kalinong sa paminsaron kag mga personal nga relasyon.

Sa desisyon sang korte, ginhambal sini nga gin-abuso sang duha ang hilway nga pagpahayag sa pag-red-tag nila kay Araullo. Ini ang pinaka-una nga desisyon sang isa ka korte sa kasubong nga tipo sang kaso.

Gingamit sang huwes bilang basehan sang hukom ang ginpagwa nga desisyon sang Korte Suprema nga nagahambal nga ang “Red-tagging, pagpang-guba sang pagkatawo, pagbansag, kag pagkabig nga may kasal-anan tungod sa pagka-imbolbar ang nangin pamahog sa kinamatarung sang isa ka tawo sa kabuhi, kahilwayan, ukon seguridad.”

Samtang, makabig man nga kadalag-an sang kolektibo nga aksyon sang pumuluyo ang napasar nga resolusyon sang lokal nga konseho sa Naga City kag Baguio City batuk sa Red-tagging kag iban pa nga porma sang intimidasyon kag kalakasan sa mga tigpangapin sa tawhanon nga kinamatarung.