Human ang 13 ka pagdungog, girekomenda sa Quad Committee sa Kongreso niadtong Disyembre 18 ang pagpasaka og kasong krimen batok sa katawhan kang kanhing presidente nga si Rodrigo Duterte ug sa iyang mga alipures tungod sa malukpanong ekstrahudisyal nga pagpatay ilalum sa mini nga gubat kontra-droga sa iyang administrasyon. Ang maong kaso pareho sa gipasaka sa mga pamilya sa mga biktima sa gubat kontra-droga sa International Criminal Court (ICC). Dungan niini, girekomenda usab sa komite ang pagpasaka og lain pang kasong kriminal batok sa mga nalambigit sa Philippine Offshore Gaming Operations o POGO.

Matud sa taho sa komite, usa sa mga nabutyag sa pagdungog ang sistema sa paghatag og reward ni Duterte nga nagpondo sa “gubat kontra-droga” sa iyang administrasyon. Matud niini, nagbunga ang maong sistema og culture of impunity nga nagresulta sa ekstrahudisyal nga pagpatay sa 12,000 hangtud 30,000 ka mga tidudahang nagagamit og droga. Sumala sa mga mitambong sa mga pagdungog, ang maong sistema nagsubay sa “modelong Davao” nga ekstra-hudisyal nga pagpamatay sa panahon nga meyor pa si Duterte sa Davao. Giangkon mismo ni Duterte, sa usa ka higayong mitambong siya sa pagdungog, ang paghatag og reward ngadto sa mga pulis gikan sa sobrang pondo sa mga operasyong kontra-droga.