Wala magdeklara og hunong-buto karong Pasko ang Partido Komunista ng Pilipinas ug Bagong Hukbong Bayan (BHB) tungod sa walay hunong nga gubat pagpanumpo sa rehimeng Marcos, mga opensibong operasyon militar, ug pagpahamtang og balaod militar sa kabanikanhan.
Sa desperasyon nga mapukan ang pakigbisog sa katawhan, kasamtangang naglunsad ang Armed Forces of the Philippines (AFP) og mga operasyon militar sa tibuok nasud batok sa Partido ug BHB. Aron maninduton ang ilang imahe sa publiko, gipakusog sa AFP ang gubat sa disimpormasyon aron ipatoo ang publiko sa hambog niining deklarasyon nga “usa na lamang ka huyang nga natarang gerilya sa BHB” ang nahabilin. Apan, mismong ang ilang mga aksyon ang nagpahimakak niini. Minilyong piso ang giusik-usikan karon sa dagkung pagdeploy sa pwersa ug opensiba sa tanang rehiyon sa nasud.
Ang maong sitwasyon nag-awhag sa BHB nga lig-ong iasdang ang armadong pakigbisog ug maglunsad og mga taktikal nga opensiba, ilabina batok sa labing gikasilagang pasistang tropa nga responsable sa mga ekstra-hudisyal nga pagpatay, mga masaker, ug tanang klase sa terorismo. Kini aron panalipdan ang katawhan ug tubagon ang ilang nagkakusog nga panawagan alang sa hustisya ug pagtapos sa balaod militar sa ilang mga lugar.
Isip pagpangandam sa umaabot nga selebrasyon sa ika-56 nga anibersaryo sa Partido, ang mga yunit sa BHB ug mga lokal nga organisasyon sa masa sa mga mag-uuma sa kabukiran nangandam sa mga miting ug ginagmayng panagtigum aron saulugon ang mga nangaging kadaugan, aseson ang ilang mga kahuyangan ug kalig-on, ug subling palig-onon ang ilang determinasyon nga maglunsad og mas dagkung pakigbisog sa sunod tuig.
