Malampuson nga naduso sa mga mamumuo ug uban pang demokratikong sektor ang ilang katungod nga makarali sa tiilan sa Mendiola sa syudad sa Maynila niadtong Nobyembre 30 kauban sa pagsaulog sa Adlaw ni Bonifacio.

Wala nahadlok ang mga nagprotesta bisan sa pipila ka higayon silang giatake sa mga pulis aron babagan ug bungkagon ang ilang martsa. Kapin sa 40 ka partisipante sa rali, kadaghanan mga kabatan-onan, ang nasamdan sa kabangis sa mga pulis. Gidakop usab sa mga pulis si Nilo Mortifero, usa ka senior citizen ug organisador sa Bayan Muna nga bag-ohay lang naulian gikan sa stroke.

Gideklara sa mga mamumuo kining adlawa isip adlaw sa pagpaningil sa masang kabus sa rehimeng Marcos Jr. Gidala nila ang panawagan alang sa makabuhing suhulan, regular ug desenteng trabaho, ug baratong pagkaon ug serbisyo. Kadikit kini sa mga panawagan sa pagpanubag sa mga abusado ug kawatan nga nagkawkaw sa pondo sa katawhan.

Dungan sa protesta sa Mendiola, adunay mga panagtigum ang mga mamumuo sa Far East Alcohol Corporation sa Apalit, Pampanga; Umicore sa Subic, Zambales ug Nexperia Philippines sa Laguna. Kauban ang ubang sektor, gipahigayon sa mga balangay sa KMU ang mga protesta sa mga syudad sa Baguio, Calamba, Cebu ug Davao.