Panaghisgot kalinaw, ipadayon! Nagtapok ang mga grupong pangkalinaw niadtong Nobyembre 21 sa Maynila aron dumdumon ang usa ka tuig nga anibersaryo sa Oslo Joint Statement sa Gubyerno sa Pilipinas (GRP) ug National Democratic Front of Philippines (NDFP) nga gipirmahan niadtong Nobyembre 23, 2023. Gipadayag nila ang ilang paglaum sa subling pag-abli sa negosasyon, kauban ang ilang kabalaka sa sunod-sunod nga pag-aresto sa mga konsultant sa NDFP niadtong Oktubre. Gipangunahan ang panagtigum sa Council of Leaders for Peace Initiatives.
Nagprotesta ang Friends of the Filipino People in Struggle ug ang mga myembro niini sa United States, Canada, Netherlands, Hong Kong ug uban pang nasud niadtong Nobyembre 30 isip suporta sa NDFP. Gikundena nila ang pagpanumpo ug pag-atake sa mga konsultant pangkalinaw sa NDFP sa miaging mga tuig.
Piket sa mga mamumuo sa Pampanga. Nagmuntar og piket ang mga mamumuo sa SG Farms Processing Plant ug Maximus Dressing Plant sa Barangay San Isidro, San Simon, Pampanga aron suklan ang iligal nga pagsarado sa planta. Gitukod sa Maximus Employees Union-NAFLU-KMU ang ilang piketlayn niadtong Oktubre 8 ug nanawagan og separation pay ug pagkuha kanila sa ahensya. Kalit nga gisira ang planta sa dihang nagparehistro ang mga mamumuo sa ilang unyon niadtong Hulyo. Gisundan kini sa piket sa mga mamumuo sa SG Farms nga silinganng planta. Nagtuo ang mga mamumuo nga usa ra ang tag-iya sa maong mga planta.
Katungod sa panginabuhi, giduso sa mga manindahay sa Davao City. Miadto sa Davao City Hall niadtong Nobyembre 22 ang mga tindero ubos sa Agdao Laray Muslim and Christian Vendors Association aron hatagan sila og proteksyon batok sa kanunay nga “clearing” ug hulga sa demolisyon nga naghatag og kabalaka sa ilang mga paninda ug katungod sa panginabuhi. Nanawagan sila sa lokal nga gubyerno nga mopagawas og resolusyon aron hatagan sila og angayang luna aron makapanginabuhi sila sa malinawong pamaagi. Usa ka adlaw sa wala pa kini, nagprotesta sila sa Rizal Park sa syudad.
