Pamatan-on sa Northern Samar, ginpatay sang 20th IB

Ang Bayan
November 21, 2024

Nagapanindugan ang mga residente sang Barangay Sulitan, Catubig, Northern Samar nga isa ka sibilyan si Jerick Jugal, isa sa mga ginpagwa sang 20th IB nga napatay sini sa serye sang armadong engkwentro sa Bagong Hukbong Bayan (BHB) sa banwa sang Catubig sadtong Nobyembre 5.

Nagapanawagan sila sang imbestigasyon kag hustisya sa pagpatay sa biktima. Suno sa tupad balay ni Jugal, isa siya ka responsable nga anak nga amo ang solo nga nagapangita sang pangabuhian para sa ila pamilya.

Pagkatapos sang ginsiling nga mga engkwentro, nagreklamo man ang mga residente sang Barangay Sulitan kag katupad nga mga komunidad tungod sa ginpatuman nga pagpang-ipit sang mga soldado. Wala sila ginapasugtan nga makakadto sa mga ulumhan agud magtrabaho kag gindumilian bisan ang pagsulod sang pagkaon sa komunidad.

Samtang, nalista sa Guihulngan City, Negros Oriental ang serye sang mga paglapas sang tawhanon nga kinamatarung sang 62nd IB.

Sadtong Nobyembre 5, ginsulod sang 16 ka soldado ang balay ni Loring Geronimo sa Sityo Ponong, Barangay Trinidad. Ginpangita sa iya ang iya bana kag anak, gintayaan siya kag ang iya apo sang matag-as nga kalibre sang pusil kag ginpaidalum ang bug-os nga pamilya sa mapintas nga interogasyon. Sa adlaw man nga ini, iligal nga ginsulod sang mga soldado nga wala sang pagpahanugot ang balay ni Helen Bardok sa Barangay Binobohan samtang yara siya sa trabahuan.

Sadtong Nobyembre 8, ginkastigo sang mga soldado sang 62nd IB ang 38-anyos nga mangunguma nga si Boyet Ospar sa Sityo Manlibod, Barangay Trinidad. Nalista man sang nagligad nga mga semana ang iligal nga okupasyon kag pagkampo sang mga soldado sa mga eskwelahan sa mga barangay sa Guihulngan City, Vallehermoso kag Canlaon City. Ang pagkampo sa mga sibilyan nga pasilidad malala nga paglapas sa internasyunal nga makatawo nga layi.

Pagpang-agaw sang duta. Gin-ipit kag liwat nga gintilawan nga palayason sang mga pwersa sang estado kag pribado nga gwardya ang mga residente nga mangunguma sa Barangay Viga, Angadanan, Isabela. Gina-agaw sang pamilya Gamboa ang 23.6 ektarya nga duta nga 50 ka tuig nga ginabungkal kag ginapuy-an sang mga mangunguma nga katapo sang Panagkaykaysa ti Mannalon a Maag-agawan ti Daga. Ginkadtuan sila sang hepe sang pulis kag administrador sang banwa sang Angadanan sadtong Oktobre 30 agud piliton nga makig-areglo sa mga Gamboa. Gintanyagan sila sang suhol nga kwarta agud maglayas sila sa lugar.

Liwat nga nagbalik ang hepe kag duha ka pulis sadtong Nobyembre 2 agud ipaagaw sa mga pribado nga gwardya kag ipasunog ang mga plakard kag istrimer sang mga mangunguma. Sang naggitgitan sa mga residente kag pulis, nag-gabot kag nagpanaya sang pusil ang hepe sang pulis. Tatlo ka mangunguma ang gin-aresto. Ginpahog sang mga gwardya nga wasakon ang mga pananum sang mga mangunguma.