Sa isa ka larangan sa Masbate, malahalon ang ginatungdan nga papel sang pahayagan nga Ang Bayan (AB) sa konsolidasyon sang Hukbo kag baseng masa.
Suno kay Ka Louie, giya pangpulitika sa isa ka yunit sang amo nga larangan, dako ang papel sang AB sa paghatag sang pangpulitika nga edukasyon sa Hukbo kag masa.
“Kabahin sang programa sa edukasyon sang amon yunit amo ang mga discussion group (grupo pangtalakayan ukon DG). Katuyuan sang mga DG nga hanason ang mga kaupod sa pagtalakay kag pagpropaganda.
Ginahapag sang yunit nila Ka Louie sa talakayan ang kada isyu sang AB, pati mga isyu sang Silyab, Ang Kusog, pahayag ukon polyeto kag iban pa nga malip-ot nga mga dokumento. “Sa yunit, kumpleto namon nga natun-an ang halin 2023 tubtob subong. Ginabalikan man namon ang pila ka daan nga artikulo sang AB nga santo sa mga hambalanon nga gina-atubang sang yunit,” suno sa iya. Isa diri ang artikulo nga “Linyang Masa sa Hilikuton Rekoberi sa Leyte,” gintun-an nila ilabi na kag yara sa sitwasyon rekoberi sila sa sakup sang ila operasyon.
“Dako nga hangkat para sa amon ang pagpasaka sang pangpulitika nga kamuklatan, ilabi na sa pamatan-on nga bag-ong pultaym nga babad sa Tiktok, Facebook, Mobile Legends kag iban pa nga impluwensya sang neoliberal nga kultura. Kinahanglan ang AB agud updated kag ipasaka ang interes sang mga kaupod sa paghibalo sa subong nga sitwasyon pangpulitika kag hinay-hinay sila nga hanason sa kakinahanglanon nga ipahangup ini sa masa,” pagpaambit niya.
Sa sitwasyon nga permi mahulag ang kaaway, mapuslanon ang naamot sang AB sa madasigon kag mahulag nga mga pagtuon pangpulitika sa masa. Siling ni Ka Louie, may mga higayon nga kinahanglan nga matapos ang pagtuon, paghimo kag pagplano sang mga organisasyon masa sa sulod lang sang isa ka adlaw. Magluwas sa istagard nga mga sandigan nga pagtuon sa Pungsodnon Demokratiko nga Eskwelahan, nagamit sang yunit ang AB sa kaangay nga mga sitwasyon.
“Mahapos man isingit ang AB sa masami nga kasakuon sang masa sa produksyon,”siling niya.
Suno sa iya, halin sa ulihi nga kwarto sang 2023 tubtob subong nga Oktobre, nahuman ang 37 ka bats sang pagtalakay sang AB, kadam-an sa mga pamatan-on.
Sa pihak sang ipit-ipit nila nga sitwasyon, padayon nga makakita ang mga kaupod sang masarangan nga mga pamaagi para pangibabawan ang limitasyon sa pagpalapnag sang AB kag iban pa nga materyales sa propaganda.
“Antes ang pagpang-atake sang RCSP, nasarangan namon maka-repro (makapadamo) sang puluan ka libo ka kopya, AB man ina ukon iban pa nga dokumento. Sa subong nga todo opensiba sang kaaway wala pa gid mabalik sa amo nga lebel ang kapagsik sang distribusyon. Apang wala kami naga-untat sa pagpursige sandig sa pagtugot sang kahimtangan.”
Sa kahimtangan nga mabudlay makapag-imprenta, nangin remedyo sang mga larangan gerilya ang pagpalapnag sang mga kopya nga digital sang AB gamit ang smartphone. “Kinahanglan makasabay sa nagabag-o nga panahon, ilabi na nga madamo sa masang pamatan-on sa subong ang nagagamit sang Android. Syempre, may pagseguro sa mga protokol sa seguridad sa paggamit sang elektroniko nga gadgets.”
Gamit ang mga file sharing app, ginapasahan sang mga kaupod ang masa sang mga dokumento. “Sila naman ang ginapalihog namon nga magpalapnag sa ila mga tupad balay ukon kababaryo,” estorya ni Ka Louie. “Dako nga bonus kon makalugar ang mga napasahan nga katapo sang sanga, nahanunga nga pwersa ukon organisasyon masa nga magpatigayon sang kolektibo nga pagbasa.”
Sa pagtinguha sang mga kaupod kag masa sa isa ka larangan, nakapalapnag sila sang linibo ka kopya sang AB, pareho sa dagway nga gin-imprenta kag digital copy halin 2023.
Ang pagtib-ong sa AB bilang pahayagan sang Partido katungdanan sang kada rebolusyonaryo. Kaangay sang iban nga rebolusyonaryo nga hilikuton, gina-ubayan ini sang mga prinsipyo nga Marxista-Leninista-Maoista. Para kay Ka Louie, ang gina-uyatan niya sa katungdanan nga ini ang espirito sang materyalismo diyalektika. “Tanan nga mga problema may solusyon. Kon indi gusto may rason, kon gusto permi may yara sang pamaagi,” suno sa iya. “Paano mo mahibaluan kon indi mo tilawan? Sa sitwasyon sang pagrekober kag pagbangon, sa amo sini nga espirito namon ginahangup kag gina-uyatan ang MD.”
Para sa iya, ang pagtuon kag pagpalapnag sang Ang Bayan isa ka pahanumdom sa sandigan nga Marxistang prinsipyo nga ini. “Abante sandig sa masarangan. Payt lang!”
