Kaangay sang mga idu-buang kag uhaw sa dugo ang mga katapo sang pasistang 62nd IB sa pagpanglusob sa mga komunidad sa syudad sang Guihulngan, Negros Oriental. Padayon sila nga naga-perwisyo kag nagabayolar sang tawhanon nga kinamatarung sa lugar.
Hunyo 16 alas 11:00 sang aga—ginlusob sang anum nakasibilyan kag armado nga tropa sang 62nd IB ang wala sang tawo nga puluy-an sang mag-asawang Jenny Turno sang sityo Laos, Barangay Binobohan. Nagbilin sang istorya kag pagpamahug ang militar sa tupad balay sang biktima nga ginpatawag ang mga ini sang Alpha Company Detachment sang nasambit nga tropa nga nahamtang sa Barangay McKinley. Naghatag ini sang kahadlok sa mag-asawa kag kahangawa kon anu gid bala ang ila kaso kay normal man lang sila nga nagapanguma kag nagapangabuhi sa nasambit nga baryo.
Kadungan sina, nagalambiyong man ang militar sa Sityo Sawmill, Barangay Tacpao. Nagapangsaka-saka sa mga kabalayan kag nagapamilit nga magtiner sa mga puluy-an sang mga residente.
Hunyo 15 tubtob Hunyo 17—ginpalibutan sang pasistang 62nd IB ang Sityo Lip-o, Barangay Imelda. Nagatiner ang mga ini sa kabalayan, eskwelahan, barangay hall lakip na sa mga simbahan.
Nakapakat man ang mga kolum sang militar sa mga sityo sang Antibalas, Calakdog kag Anibong, sakop sang Barangay Humay-humay.
Makita man ang mga kolum sa mga sityo sang Daat-daat, Panab-angan kag Talamban sang Barangay Planas.
Halos apat man ka kolum sang pasistang tropa ang nahisayran sang mga residente nga nagapalubong sa mga kalasangan sang Barangay Imelda ilabe na sa Sityo Lip-o sang nasambit nga baryo.
