Ang Regional Operations Command sa Bagong Hukbong Bayan sa North Eastern Mindanao Region (ROC-BHB-NEMR) nagsaludo ug nagpahalipay ngadto sa tanang mga Pulang kumander ug manggugubat sa lainlaing yunit sa BHB-NEMR ug sa tibuok nasud, sa pagsaulog sa ika-51 nga anibersaryo sa pagkatukod sa Bagong Hukbong Bayan. Gipasidunggan ang tanang Pulang kumander ug manggugubat ug mga masa nga nagbuhis sa ilang kinabuhi alang sa padayong pagpaasdang sa gubat sa katawhan.
Pinaagi sa absolutong pagpangulo sa Partido, napalambo ang mga platun gerilya ug pila ka kumpanya sa tanang bahin aron molig-on ug moasdang kini. Gisiguro nga makakuha ang mayorya sa mga membro sa BHB sa mga pulitikanhong edukasyon aron motaas ang ang-ang sa ilang kahimatngon. Mapadayunon silang naglunsad og mga pagbansay-militar aron aduna silay igong katakus sa pakig-sangka. Pinaagi niini, motaas ang ilang kaakuhang mosukol batok sa nagpahimulos ug nagdaugdaug sa katawhan.
Mapadayunong gihawiran sa mga Pulang kumander ug manggugubat sa rehiyon ang mga batakang prinsipyo sa malungtarong gubat sa katawhan. Makugihon ug mapangahason silang naglunsad og pakiggubat pinaagi sa mga taktikal nga opensiba batok sa AFP, PNP ug paramilitar sa rehimeng US-Duterte. Tungod niini, napreserba ang pwersa sa BHB ug mga masa sa rehiyon.
Taliwala sa bangis ug pasistang paghari sa rehimeng US-Duterte ug sa mga pakana niini, sama sa martial law, all-out war, NTF-ELCAC, ug uban pa, nagpakita ang BHB-NEMR sa kapursigido diha sa iyang gilunsad nga mga kontra-atakeng lakang. Tungod niini, nakapatigbabaw kini batok sa mga pagpangatake kaniya ug, sukwahi sa ginapasiatab sa AFP, walay bisan usa ka nataran o yunit gerilya ang napuo sa rehiyon.
Sa tibuok 2019, naglunsad ang AFP/PNP/paramilitar og mga sustinidong operisyong militar ug CSP (community support program) sa laraw nga puohon ang BHB sa pagtapos sa tuig. Apan, nakalunsad ang lainlaing mga yunit sa BHB sa rehiyon og mga kontra-aksyong militar aron panalipdan ang pwersa niini ug ang katawhan. Sa unang 3 ka bulan sa tuig 2020, labaw pang gipaigting sa AFP ang mga operisyong militar ug CSP niini. Apan gisuklan gihapon kini sa BHB sa rehiyon, ug sa unang 3 ka bulan sa 2020, ubay-ubay na ang nahimong kaswalti sa han-ay sa AFP, PNP ug Cafgu. Pakyas, sa laktod, ang pasistang rehimeng US-Duterte sa iyang laraw nga dugmukon ang BHB sa iyang gitakdang panahon.
Matngon ug determinado ang BHB-NEMR sa pagpatuman sa mga tahas niini sa pagpukaw, pag-organisa ug pagpalihok sa masa. Mamugnaong gipalambo nila ang rebolusyonaryong kultura, gimbuhatong medikal, literasiya ug numerasiya sulod sa mga erya niini.
Naningkamot usab kini nga mapapaspas ug mapakusog ang agraryong rebolusyon aron nga makatagamtam og mga mahinungdanong mga benepisyo ang katawhang mag-uuma ug Lumad sa rehiyon. Padayon kining nakaangkon sa suporta sa masa, ilabina sa mga batan-ong mosampa ngadto sa ilang Pulang hukbo.
Sa kasamtangan, nag-atubang ang katawhan sa nasud sa pagkuyanap sa COVID-19 (coronavirus disease 2019). Nahimo na kining usa ka hinanaling pangkalibutang problema tungod sa paspas nga pagkuyanap niini sa lainlaing mga kanasuran. Tungod niini, nanawagan ang United Nations (UN) nga magpahigayon og temporaryong hunong-buto sa tanang nanagsumpaking armadong pundok sa tibuok kalibutan.
Sa pagsanong sa panawagan sa UN, gimanduan sa Komite Sentral sa PKP ang tanang mga yunit sa BHB sa nasud nga magpatuman og unilateral nga temporaryong hunong-buto sugod Marso 26, 2020 hangtud Abril 15, 2020. Gikinahanglang manguna ang BHB diha sa hiniusang lihok batok sa padayong pagkaylap sa maong sakit, ilabina sa mga hingtungdang mga erya niini sa kabukiran. Maglunsad og kampanyang edukasyon sa pagpatin-aw mahitungod sa COVID-19 ug paglikay niini. Palihukon ang mga komite sa panglawas ug uban pang organisasyon alang niini.
Bisan pa man sa gideklara nga temporaryong hunong buto sa PKP ug BHB, padayong panalipdan ang katawhan batok sa hulga sa CSP/COPD ug operisyong militar sa AFP, nga nagapadayon sa daghang mga erya sa rehiyon taliwala sa “hunong-buto” ni Duterte. Busa, gimanduan usab ang tanang mga yunit sa BHB sa rehiyon nga ipabilin ang taas nga pagkaalerto. Gitin-aw nga ang unilateral nga hunong-buto nga mando sa PKP ngadto sa BHB dili tugbang sa unilateral nga hunong buto ni Duterte. Tataw nga gipahimuslan lang ni Duterte ang kahimtang aron nga samot pang makamaniobra aron atakehon ang rebolusyonaryong kalihukan ug katawhan.
Hinanaling mo-report ngadto sa mga nahataas nga mga yunit sa BHB-NEMR kabahin sa nagapadayong operisyong pang-kombat ug CSP/COPD sa AFP, PNP ug paramilitar sa lainlaing erya sa rehiyon.
Padayong magpursigi diha sa malisod nga dalan sa demokratikong rebolusyon sa katawhan. Patigbabawan ang konserbatismo. Labaw pang palig-onon ang kaakuhan nga mas pakusgon ang gubat sa katawhan hangtud sa hingpit nga kadaugan.
Mabuhi ang ika-51 nga anibersaryo sa BHB!
Ka Ariel Montero
Tigpamaba
Regional Operational Command
