Sulod sa anum ka bulan nga wala untat nga atake sang pasista nga 94th IB, indi magnubo sa 30 ang ila biktima sang paglapas sang tawhanong kinamatarong sa mga syudad sang Himamaylan kag Kabankalan sa tuig sang 2025.
Sa tala sang Romeo Nanta Command-New People’s Army (RNC-NPA), nakakomiter ang nasambit nga mersenaryong militar sang duha ka kaso sang pagpamahog (apat ka biktima), tatlo ka kaso sa iligal nga pagpangdakop (lima ka biktima), pito ka kaso sa pagpangastigo (14 ka biktima), duha ka kaso sa pagpangransak sang balay sa pumuluyo (apat ka biktima), duha ka kaso sang pagpanguha sang cellphone sang komunidad, kag sang ulihi, ang peke nga engkwentro kag pagpatay sa isa ka mamumugon sa kampo sa Sityo Ompokon, Barangay Buenavista, Himamaylan City, pagkastigo sa amay kag iligal nga pag-aresto sa utod sang biktima sadtong Hunyo 6.
Magluwas pa sini, may mga kaso man sang extortion (pagpangilkil sang kwarta) sa mga small planters sang tubo kag iban pa nga pumuluyo sa mga traydor sang rebolusyon nga hawid na subong sang 94th IB. Ang mga traydor ukon ‘surrenderees’ ginatukmod sang AFP nga makakomiter sang mga krimen sang pumuluyo kabaylo sang kwarta ukon pasalig sang kahilwayan, pero sa aktwal ginahimo lang nga mga suluguon.
Imbes nga atubangon kag akuon ang ila mga krimen batok sang masang pigos kag ginhimuslan, ginapanghinabonan pa ini sang AFP paagi sa paghatag sang mga merito kag medalya sa kuno mga ‘achievements’ nga nakuha sang berdugong batalyon. Sa esensya, ang ini pamatuod kag pahinumdom sa ila nga utang nga dugo sa mga pumuluyo sa South Central Negros. Ginadayaw nila ang ila mga makasiligni nga ginpangkomiter kag gingamit para mutaas ila sweldo kag ranggo, kabaylo sa kabuhi sang mga mangunguma kag mamumugon sa lugar.
Hugot nga ginakundenar sang RNC-NPA ang ini nga mga paglapas sang tawhanong kinamatarong kag paglapak sang kasugtanan sang Comprehensive Agreement on the Respect for Human Rights and International Humanitarian Law).
Ginaawhag namon ang pumuluyo nga indi magkahadlok nga magreport sang mga krimen sang militar kag ipalapta ini sa social media kag sa iban pa nga media outlets para masuktan ang berdugo kag bayaran nga batalyon sa ila nga mga krimen.
Ini nga mga paglapas sang tawhanong kinamatarong isa man ka dakong tampa sa ila pekeng deklarasyon nga ‘dismantled’ na ang larangan gerilya sa South Central Negros. Amo man ang padayon nga sustained focused military operations (SFMO) sang 94th IB sa lugar hasta subong. Gani, ini pamatuod nga nagpabilin nga husto kag kinahanglanon ang armadong rebolusyon bangud amo ini ang makahatag hustisya sa mga biktima sa pasismo kag tiranya sang garok nga sistemang ginadepensahan sang mga ido-ido pareho sang 94th IB kag mga traydor sang rebolusyon.
Baliskad ang ginapagwa nga istorya ni Lt. Col. Tayaban, CO sang 94th IB, nga ‘hamulag na ang NPA sa pumuluyo bangud sang mga ginakomiter nga sala’. Sa matuod, sila mismo ang nahamulag sa masa bangud sa tayuyon nga paggamit nila sang kapintas kag pagpanginto ilabi na sa mga mangunguma kag tumanduk sa lugar.
Dugang pa, akig ang pumuluyo sa mga traydor sa rebolusyon nga nasilaw sa kwarta kag pagpanghaylo. Maathag man sa pumuluyo nga ang tanan nga aksyon sa NPA nakabase sa rebolusyonaryong hustisya, kag ginagamit lang ini sa mga tawo nga napamatud-an nga may mga sala sa rebolusyon kag sa masa.
Padayon nga ginausoy sang mga Pulang hangaway ang banas sang sakripisyo kag kabudlayan. Maathag para sa NPA ang iya makasahi nga baruganan nga magdepensa sa interes kag kaayuhan sang masang pigos, kag magsukot sang hustisya sa tanan nga may krimen sa ila.
Ang pasismo sang estado pamatuod lang sa iya kadesperado kag kahadlok sa pumuluyo nga magbato bangud sa iya man nga pagpanghimulos, pero amo man ini ang magtudlo sa mas madamo pa nga musampa sa NPA kag magtukod sang buwas damlag nga may matuod, husto, kag pangmalawigon nga kalinong kag demokrasya.
