Ang laban para sa kalikasan ay laban ng mamamayan upang mapawi ang bulok na sistemang madumi, mapangwasak at marahas! Mga tanggol-kalikasan, isulong ang digmang bayan hanggang tagumpay!

Liga ng Agham para sa Bayan (LAB) | National Democratic Front of the Philippines

Ipinagdiwang noong Abril 22, 2025 sa buong daigdig ang Earth Day. Isang paalala ang Earth Day sa kahalagahan ng kalikasan at ang paggunita sa sama-samang pagkilos ng mamamayan upang ipaglaban ito para sa kanilang kabuhayan at kinabukasan.

Sa dikta ng mga dayuhan, patuloy na nawawasak ang ating saribuhay dulot ng pandarambong sa ilalim ng rehimeng US-Marcos. Winawasak ng mga neoliberal na polisiya ang mga taniman, pangisdaan, kagubatan, at karagatan na dapat napapakinabangan ng mamamayan.

Ginigipit ng rehimeng US-Marcos ang mga maliliit na mangingisda sa pagpasok sa 15 kilometer municipal waters ng dambuhalang mga komersyante. Dumaranas sa epekto ng krisis sa klima o climate crisis ang mga marginalisadong mga komunidad habang kapabayaan ang tugon ng rehimeng US-Marcos sa mga sakunang nanalasa. Walang sapat ng kumpensasyon o rehabilitasyon sa mga ari-arian at imprastruktura dahil sa malawak na korupsyon sa pamahalaan.

Imbis na maglaan ng subsidiyo at alokasyon o palakasin ang agrikultura, o kaya’y ipatupad ang pangmatagalang solusyon sa kasalukuyang krisis sa paraan ng tunay na reporma sa lupa at pambansang industriyalisasyon, sinasamantala ng naghaharing-uri ang krisis sa klima para dambungin ang likas-yaman at itaboy ang mamamayan mula sa kanilang lupa at kabuhayan. Ginagamit ang mga proyekto kagaya ng mga solar farm at mega-dam para manatiling konsentrado sa kamay ng iilang kapitalista ang rekurso ng bansa. Ang mga pekeng solusyon na ito upang tugunan diumano ang krisis sa klima sa pamamagitan ng renewables ay nagsasadlak sa lalong paghihirap sa masang magsasaka, mangingisda, at katutubo.

Tumitindi rin ang pasismo upang supilin ang mga magsasaka, pambansang minorya, at iba pang sektor na humaharap sa pagpigil ng pagpasok ng mga mapanirang proyekto tulad ng mga malakihang operasyon ng mga pagmimina at mga dam. Tuloy ang paglulustay ng kaban ng bayan para sa walang-kwentang digma, sa paraan ng pagbili ng kagamitan sa bilyon-bilyong halaga at pambobomba at militarisasyon sa kanayunan. Nagpapatuloy ang panghihimasok ng US sa pamamagitan ng Visiting Forces Agreement (VFA) at Enhanced Defense Cooperation Agreement (EDCA) na daan upang kontrolin ang ating teritoryo, habang patuloy na lumalaganap ang mga peligro sa kalikasan at kabuhayan.

Gayunpaman, patuloy ang mamamayan sa puspusang pakikibaka, pagtatanggol at paglantad sa mga ugnayan at krimen ng pandarambong sa kalikasan ng rehimeng US-Marcos. Sila ay nag-aaral, nag-oorganisa, at naglulunsad ng iba’t ibang kampanya at pakikibaka upang palayasin ang mapandambong at mapangwasak na mga proyekto at mga tropa ng militar sa kanilang komunidad.

Hindi maihihiwalay ang pakikibaka para sa kalikasan sa malawak na pakikibaka ng mamamayan sa pambansang demokrasya. Tunay lamang na matatamasa ng mamamayan ang ligtas, masagana, at malusog na kapaligiran kung tayo ay makakawala sa mapangwasak at marahas na kontrol ng imperyalismo, pyudalismo, at burukrata kapitalismo.

Ang CPP-NPA-NDFP ay hindi lamang nangunguna sa pagsulong ng mapagpalayang demokratikong rebolusyong bayan. Sa proseso ng pagsulong na ito ay pursigido rin ang rebolusyonaryong kilusan sa pagtataguyod at pagsulong ng makakalikasang programa at mga polisiyang layunin ang sustenable at balanseng paggamit ng mga likas na yaman na nakaayon sa pangmatangalang pag-unlad ng lipunan. Sa mga lugar na nasasaklaw ng demokratikong gobyernong bayan ay sinisikap pangalagaan ang kalikasan at labanan ang mapangwasak na mga proyekto, kasabay ng paglaban sa dahas at paggigipit ng estado at pagtatatag ng binhi ng sosyalistang lipunan.

Kaya’t nararapat at makatarungang lamang ang paglahok sa demokratikong rebolusyong bayan, kasabay ng patuloy na pagbibigay sa suporta sa Bagong Hukbong Bayan, isa sa magigiting natin na tanggol-kalikasan. Laksa-laksa nating imobilisa ang ating hanay upang direktang mag-ambag sa armadong pakikibaka sa kanayunan at pagtatagumpay ng demokratikong rebolusyong bayan.

Mabuhay ang mamamayang lumalaban!

Kalikasan at bayan, pangalagaan at ipaglaban!

Imperyalismo, pyudalismo at burukrata kapitalismo, ibagsak!

Sumapi sa BHB, isulong ang digmang bayan!

The post Ang laban para sa kalikasan ay laban ng mamamayan upang mapawi ang bulok na sistemang madumi, mapangwasak at marahas! Mga tanggol-kalikasan, isulong ang digmang bayan hanggang tagumpay! appeared first on PRWC | Philippine Revolution Web Central.