Gikan pa niadtong Oktobre 1 hangtod karon, padayon ang terorismo sa mga tropa sa 62nd IB sa Central Negros.

Sa Guihulngan City, Negros Oriental, dili moubos sa 15 ka kolum ang anaa sa mga sityo sa Amumuyong, Panagtugas, Agit, Panginyanan, Pinangulangan, Banderahan, Calambia ug Pinangimnan, nga sakop sa Barangay Trinidad.

Aduna sab mga tropa militar sa Sityo Binil-iwan, Barangay Calupaan.

Samtang, sa Canlaon City, Negros Oriental, anaa lang gihapon ang mga sundalo sa mga sityo sa Malatanglad, Gusa ug Ehid, nga sakop sa Barangay Budlasan ug may nakita man sa proper sa Barangay Bucalan.

Nataho sab nga may mga sundalo sa Sityo Plasan, Barangay Guba, Vallehermoso, Negros Oriental.

Ang kasamtangang operasyon sa militar mihatag og kalisang sa lumulupyo kay nagtiner kini sa mga balay sa mga mangunguma.

Niadto lang Oktobre 16, pasado alas 6:00 sa buntag, gisaka sa mga pasistang sundalo ang balay ni Lucia Villaluna sa Sityo Calambia, Barangay Trinidad, Guihulngan City.

Samtang sa Sityo Kamabairan, sa maong barangay, gikasuko usab sa lumulupyo ang gibuhat sa mga pwersa sa 62nd IB. Nangawat sila og mga manok, nag-inom ug nagmaoy ug gipangbuak ang mga container sa masa nga ilang gigamit sa pagkuha og tubig. Gikasuko sab pag-ayo sa mga kababaihan niini nga sityo ang binastos sa mga sundalo ngadto kanila sa ilang lugar.

Gipakita lang sa 62nd IB ang ilang kawalay respeto sa lumulupyo ug gibaylo ang kaluwasan sa katawhan para lang sa interes sa pasista ug korap nga mga itoy-itoy sa imperyalismong US.

Tungod niini, mas modugang kini sa kayugot sa lumulupyo ug motukmod sa kinabag-ang katawhan nga makigbisog ug mubarog sa ilang katungod salmot sa armadong pakigbisog para sa kagawasan ug tinuod nga demokrasya.