Baliskad sang propaganda sang reaksyonaryong gobyerno, militante nga nagbarug ang Pambansang Katipunan ng mga Magbubukid (PKM)-South Central Negros nga wala sang angay nga iselebrar sa ila kahimtang subong. Isip sektor nga nagapaseguro sang seguridad sa pagkaon sa bilog pungsod, ang mga pesante man ang labi nga nagaantus sa idalum sang mala-kolonyal kag mala-pyudal nga sistema sang aton pungsod.

Indi lipod sa tanan nga nagapabilin nga problema sang mga mangunguma ang kawad-on sang duta. Sa pagpasulod sang US-Marcos Jr sang mga proyektong maki-dumuluong, mas nagahapos pa ang ila pagpangawat sang duta sa mga mangunguma. Gani sa Himamaylan City, Negros Occidental, pila ka tuig na nga naga-opereyt ang UPC/Citicor/Mosser Corporation sa 2,000 kapin ka ektarya sa syudad. Magluwas sini, ara man ang nagahagna nga dugang nga pagkadislokar sa pangabuhian sang mga mangunguma sa pagsulod sang P2 Billion Tunnel road kag sa Kabankalan City, Negros Occidental, ang ginatikal nila nga expressway.

Nagapadayon man nga wala tubtub mumho lang ang nadawat nga mga subsidyo sang mangunguma bisan pa man nga sila ang labing apektado sa mga nag-agi nga kalamidad sa pungsod. Nagdugang pa gid sa ila gin-abaga nga problema ang tuman ka nubo nga presyo sang ila mga produkto. Resulta man ini sa pagpatuman sang mga neoliberal nga mga palisiya kaangay sang Rice Liberalization Law nga nagpaulan sang minilyon ka mga imported nga produkto sa lokal nga merkado. Kabangdanan nga napahigad ang lokal nga produksyon. Ini man ang natabo sa kontrobersyal nga pagnubo sang presyo sang kalamay sa isla sang Negros.

“Ang Rice Liberalization Law (RLL) death sentence ini para sa amon nga mga mangunguma,” hambal ni Federico Encancion, tagpamaba sang PKM – South Central Negros. Dugang niya, ang RLL isa lamang sa madamo nga neoliberal nga pag-atake nga nagahatag prayoridad sa kapital sang dumuluong kag buhi nga ebidensya sang indi paghatag pa sang igtalupangod sang reaksyonaryong gobyerno sa sektor sa mga pesante. Ang ini nga sistematiko nga pagpabaya, mas ginpalala pa gid sa korapsyon sang reaksyonaryong gobyerno.

Dugay na nga ginpanawagan sang mga mangunguma ang sabat sang problema nga ginaatubang sa ila sektor. Malawig na nga ginasinggitan nga nagakadapat lang na ipatuman ang matuod nga reporma sa duta.

Subong nga Bulan sang mga Pesante kag sa mga masunod nga binulan, mas palanugon pa sa sektor ang amo nga panawagan. Wala sang iban nga solusyon kundi ang matuod nga reporma sang duta kag pungsodnon nga industriyalisasyon agud mahilway ang pumuluyo sa malawig na nga gapos sang pagpamigos kag pagpanghimulos.

Subongman, magsuporta kag makigbahin sa New People’s Army, ang matuod nga hangaway sang pumuluyo, nga amo ang nagadala sa interes sa masang pigos kag ginahimuslan.