Nagapanindugan ang Romeo Nanta Command-NPA nga tubtub subong wala gid nasinati sang pumuluyong Pilipino ang matuod nga kahilwayan kag demokrasya. Makita sa bilog pungsod, ilabina sa isla sang Negros ang nagalala nga krisis sang kagutom kag kapigaduhon nga gintuga sang hugot nga kontrol sang imperyalistang US sa pungsod Pilipinas.

Nagabunok ang gal-um sa kabuhi sa mga mangunguma nga amo ang nangunang biktima sa pagpang-agaw sang ila duta sang mga langyaw nga kapitalista diri sa pungsod. Ang mga mamumugon sa uma nagaantus man sa nagapadayon nga mono-crop nga sistema sa isla sang Negros sandig sa panginahanglanon sa mga imperyalistang US. Ang mga mangingisda napugos nga mag-untat bangud ang kadagatan sang Negros nadominahan na sang presensya sang mga dalagkoan nga komersyal nga palaisdaan. Samtang ang mga pamatan-on nga Negrosanon bulnerable sa kolonyal nga oryentasyon sang edukasyon kag dunot nga kultura nga naglapnag sa pungsod.

Ang ginahambal sang reaksyonaryong estado nga ‘kahilwayan’, indi para sa masang pigos kag ginahimuslan, kundi kahilwayan lang sa imperyalistang mga pungsod kaangay sang US, mga agalon-mayduta, burgesya komprador, kag mga burukrata sa pagpangamkam sang duta kag rekurso sang pungsod, pagpangawat sa kwarta sang kaban sa pumuluyo, pagsulod sang tropa militar sang US agud gamiton nga lunsaran sang gyera ang pungsod, kag kahilwayan sa paggamit sang sobra nga kapintas batok sa mga pumuluyong nagahimakas para sa ila tawhanong kinamatarung.

Bug-at ang papel sang US sa kontra-insurhensyang kampanya nga ginalunsar sang rehimeng Marcos-Duterte kaangay sang mga nanliligad ng rehimen. Desperado sila nga mapukan ang NPA sa Pilipinas bangud ini lang nga armadong organisasyon sa pungsod ang nagapamatok sang bisan ano nga maniobra sang US sa pagpabaskog sang iya dominasyon. Gani, ginapamatokan man naton ang pag-intra sang Pilipinas sa mga kasugtanan militar kaangay sanga Mutual Defense Treaty (MDT), Visiting Forces Agreement (VFA), Enhanced Defense Cooperation Agreement (EDCA) kag sa bag-o nga ginkasugtan nga ‘Pax Silica’ upod sang US, Israel, Japan, kag iban pa nga nagpakita sang indi patas ukon alalangay nga tratasyon sa tunga sang mga pungsod. Dako sang epekto ang naulahi nga nasambit nga kasugtanan sa pungsod Pilipinas bangud agawan sini sang duta kag minerales ang mga pumuluyo nga ila kinahanglan para sa paghimo kag pagpaabanse sang kagamitan militar nga ginagamit sa mga henosidyo kag ‘proxy wars.’

Kasugpon man sa amo nga kasugtanan ang pagtukod sang mga dumuluong nga kampanya sulod sa 1,620 ektarya kon diin matabo ang pagproseso sa mga nasambit nga produkto. Ini nga mga kampanya maga-opereyt sandig sa layi sang US kag wala sang kinamatarung ang reaksyonaryong estado nga mangusisa kag magpasilabot sa mga desisyon kag tikang sini. Buot singganon, kon may mga kalakasan sa sulod sa erya nga direktang nagabiktima sa mga Pilipino, indi ini pwede mapasabat.

Dugang diri ang ila taktika nga paggamit sa mga tropa militar sa mga sibilyan nga imprastruktura ilabina sa tion sang war games. Pinakabag-o nga natabo ang pagpalupad nila sang Tomahawk 88 Missile sa Tacloban City Aiport. Nabutang sa peligro ang mga pumuluyo nga magagamit sini bangud mahimo na ini nga ‘legitimate target’ sa panahon nga mag-ibwal ang gyera. Gani, nagtuga ini sang trauma sa mga pumuluyo ilabina sa mga gagmay nga bata. Indi man luwas ang mga sapat kag kinaiyahan sa epekto sang war games bangud ginahalitan sini ang ila puluy-an.

Ini tanan mga pamatuod nga indi kita hilway kag ara lang kita sa malapad nga prisohan. Ini man ang rason ngaa tubtub subong ang rebolusyon nga ginsugdan sa nauna nga mga henerasyon, ginpadayon sa mga bag-ong tubo. Kinahanglan mas mangin mabakod ang mga pulang hangaway upod ang bilog rebolusyonaryong pwersa sa pungsod bangud sa padayon nga nagalala nga pangkalibutanon nga ekonomikanhon nga krisis mas nagahugot ang uyat sang impeng US sa iya mga ginakolonya nga pungsod kaangay sang pilipinas. Malab-ot lang naton ang matuod nga kahilwayan kag demokrasya paagi sang paghilway sang pungsod pilipinas sa patag sang ekonomiya, politika, militar kag kultura halin sa kamot sang impeng US paagi sa pagpasulong sang demokratikong rebolusyon sang banwa nga may sosyalistang perspektiba.