Naglab-ot na sang tatlo ka bulan ang operasyon sang 94th IB sa Barangay Biao, sakop sa banwa sang Binalbagan, Negros Occidental. Sa sulod sa ini nga mga binulan, nagatiner sila sa mga balay sang mga sibilyan kag mga pampublikong institusyon kaangay sang eskwelahan kag simbahan nga isa ka paglapas sa CARHRIHL.
Sa Sityo Gulinggan, sa amo gihapon nga barangay, ginreklamo sa mga residente ang anti-sosyal nga mga aktibidad nga ginapalapnag sang nasambit nga militar, samtang nagaoperasyon sila sa lugar. Sako sa pag-inom sang makahulubog nga ilimnon kag pagsugal ang amo nga tropa nga nagatuga sang kagamo sa lugar. Magluwas diri, nagagahud man sila bangud sang ila kahubog panahon sang pagpahuway sang mga residente.
Liwat nga ginapamatud-an sang AFP ilabina sang 94th IB nga tubtub lang sa papel ang ila mandato nga nagaserbisyo sila sa pumuluyo. Sa reyalidad, perwisyo man lang ang ila ginadala sa mga komunidad. Ini man nga mga insidente, nagadugang pagpamatuod sang kadunot sang kultura nga ara sa institusyon sang AFP. Subongman, nagapanawagan ang bilog pumuluyo sa lugar nga palayason ang mga pasistang militar sa kabukiran.
