Kusganon namong gikondena ang Armed Forces of the Philippines, partikular ang 79th Infantry Battalion, sa walay pili ug walay hinungdan nga pagpamatay sa 19 ka tawo, lakip na ang mga Pulang manggugubat sa New Peoples Army, ug dili armadong mga indibidwal sa Barangay Salamanca, lungsod sa Toboso, Negros Occidental niadtong Abril 19.
Among gipasidunggan ang iskwad sa napulo ka mga Pulang manggugubat sa NPA nga nakig-away batok sa mga pasista hangtod sa ilang katapusang ginhawa. Sila mao si:
1. Roger Fabillar (Ka Tapang), nagsilbi isip kumander sa NPA sa Northern Negros Front
2. Sonny Boy Caramihan, 28, gikan sa Barangay Bagonbon, San Carlos City;
3. Rene Villarin Sr, 57, iskwad lider ug gikan sa Barangay Marcelo, Calatrava,
4. Pedro Bonghanoy, opisyal medikal gikan sa Barangay Libertad, Escalante City;
5. Arnel Javoc, 32, gikan sa Barangay Lalong, Calatrava;
6. Joros Caramihan, 18, gikan sa Don Salvador Benedicto;
7. Maria Clarita Branzuel Blanco (Ka Sanim/Pat), Politikal Instruktor, gikan sa Tabogon, Cebu
8. Genevieve Balora (Ka Raia), kadre sa Partido sa distrito gikan sa Bacolod City
9. Labskie Purisimia Enustacion, 33, gikan sa Sitio Tinibawan, Barangay Bug-ang, Toboso
10. Jocel Gimang, 18, gikan sa Sitio Bautista, Barangay Malasibog, Escalante City
Nakigsimpatiya kami sa mga minahal sa kinabuhi ug mga kauban sa mga nangamatay nga mga Pulang manggugubat sa NPA. Bug-at sa among kasing-kasing ang ilang kamatayon. Isip mga rebolusyonaryong manggugubat, silang tanan walay pagduhaduha nga nag-alagad sa katawhang Pilipino, ilabina sa mga dinaugdaog ug gipahimuslan nga mga mag-uuma ug mamamuo sa kaumahan sa Negros. Gimahal sila pag-ayo sa mga masa. Isip pagsukol sa pagpamig-ot sa militar sa ilang mga komunidad, mitambong ug naglinya sa tag-as nga mga komboy ang katawhan sa Toboso ug Calatrava aron dalhon ang ilang minahal nga mga Pulang manggugubat sa ilang katapusang pahulayan. Kini ilang pagpahayag sa ilang taas nga respeto ug lalom nga pasalamat kanila.
Nakaagom og taktikal nga kapildihan ang New Peoples Army niadtong adlawa, apan nagpabiling tin-aw ug determinado kini nga moabante sa pagsubay sa rebolusyonaryong dalan paingon sa estratehikong kadaugan. Ang lig-on nga baruganan ug pagkamabayanihanon sa mga Pulang manggugubat niini ang makapadasig sa mga dinaugdaog nga masa nga mobangon ug mosukol pinaagi sa armadong rebolusyon. Ang dugo nga midagayday gikan sa mga napukan nga mga manggugubat atol sa ilang katapusang gubat maoy dugang makapalambo sa yuta alang sa gubat sa katawhan, diin moturok ang mas daghan pang Pulang manggugubat sa New Peoples Army.
Gipaabot usab namo ang among labing lalom nga pahasubo sa mga pamilya ug higala nilang:
1. Roel Sabillo, 19, residente sa Barangay Tabunac, Toboso
2. R.J. Nichole Ledesma, 30, community journalist gikan sa Bacolod City
3. Alyssa Alano, konsehal sa UP Diliman Student Council
4. Maureen Keil Santuyo, 24, miyembro sa National Network of Agrarian Reform Advocates (NNARA-Youth)
5. Errol Wendel, 24, miyembro sa Unyon ng mga Manggagawa sa Agrikultura (UMA)
6. J.G., 15, residente sa Sitio Plarending, Barangay Salamanca, Toboso
7. Lyle Prijoles, 40, miyembro sa International Coalition for Human Rights in the Philippines (ICHRP), gikan sa San Franciso, California (USA)
8. Kai Sorem, 26, gikan sa Seattle, Washington (USA)
9. D.P., 17, residente sa Sitio Buklog, Barangay Lalong, Calatrava, Negros Occidental
Base sa mga inisyal nga impormasyon nga among nakalap, gipatay sila bisan pa man dili sila mga armado o kun non-combatants. Lakip niini usa ka journalist, lider-estudyante, organisador sa mga mag-uuma, human rights worker gikan sa gawas sa nasod, ug mga lokal nga residente. Duha niining mga biktima mga bata.
Naghatag kami og pasidungog sa mga biktima sa Toboso Massacre, lakip na ang mga Pulang manggugubat ug ang tanan nga walay pagduha-duhang naghalad sa ilang kusog, kahibalo, ug abilidad alang sa pag-alagad sa interes sa mga dinaug-daog ug gipahimuslan nga masa. Atong subayon ang dalan nga ilang gibagtas alang sa kaluwasan sa nasod.
Ang mga opisyal ug tropa sa AFP ang nangunang responsable sa tinuyo ug walay pili nga pagpatay. Kinahanglan silang manubag ug silotan sa ilang grabeng mga krimen ubos sa internasyonal nga makitawhanong balaod.
Adunay mga bidyo gikan sa kaugalingong drone camera sa AFP ang migawas usab sa social media diin nakita nga buhi si Ka Tapang ug wala sa posisyon nga makig-away. Nagpakita kini nga gituyo siya og patay sa mga pasista, imbes tratuhon isip prisoner of war. Among giawhag ang ubang mga elemento sa AFP nga adunay uban pang drone footages nga ipalusot kini ug mobarog aron ipadayag ang tinuod nga mga panghitabo kung giunsa paghimo kining ilang brutal nga krimen, ug batukan ang mga istoryang gipanghimo-himo sa ilang mga upisyal.
Desperadong naningkamot sa pagtabon sa ilang mga krimen ang AFP ug nagmugna og mga bakak aron suportahan ang mga pamahayag niini. Ang unang pag-angkon sa AFP nga pito ka armas ang nakuha gikan sa lugar sa engkwentro, gipasaka ngadto sa 20 ka mga armas (ug sa ulahi nahimong 24) aron ipakita nga armadong manggugubat ang tanan nga namatay.
Pugos nga gipabakwit ug gikordon sa AFP ang mga lokal nga residente aron magpahamtang og blackout sa impormasyon ug pugngan ang media ug mga independenteng mga grupo nga magpahigayon og mga interbyu ug epektibong imbestigasyon sa masaker. Paglabay sa mga adlaw, usa ka grupo nga gipaluyohan sa mga militar ang gitugotan sa paghimo og kaugalingon niining fact finding mission. Kini usa ka bakak nga gidesinyo aron makahimo og usa ka AFP-certified nga istorya na mouyon sa ilang pamahayag kabahin sa usa ka lehitimong operasyon.
Nagkalain-laing mga personalidad ug sektor ang nanawagan alang sa usa ka independente nga imbestigasyon. Nagpahibalo ang Commission on Human Rights nga magpahigayon kini og imbestigasyon, bisan kung kini nagpagawas na og susama nga walay unod nga mga pamahayag kaniadto. Mahinumdoman nga misaad usab kini nga imbestigahan ang masaker sa pamilyang Fausto kaniadtong 2023 sa Himamaylan City, Negros Occidental nga naglambigit sa 94th Infantry Battalion sa AFP, apan napakyas kini sa pagdiskobre og bisan unsa nga importanteng datos ug lakang hapit tulo na ka tuig ang milabay.
Nag-antos ang lapad nga masa sa katawhang Pilipino sa nagkagrabeng porma sa panaugdaog ug pagpahimulos atubangan sa nagkalalom nga krisis ubos sa papet ug pasistang rehimen ni Marcos. Gimandoan ni Marcos ang armadong mga itoy niini sa AFP ug NTF-ELCAC nga pakusgon ang ilang mga pag-atake sa katawhan ubos sa bakak nga kalinaw ug kalamboan. Susama sa iyang amahan nga diktador, gigamit ni Marcos Jr. ang mga taktika sa terorismo aron ipailalom ang mga tawo sa pulitikal nga pagpanumpo, ilabina sa kabanikanhan diin naghari ang balaod militar.
Wala gayud molampos ang terorismo sa estado sa pagdugmok sa kaisog sa katawhan. Siguradong mapakyas ang mga atake sa rehimen ni Marcos sa pagpahunong sa katawhan nga mosukol. Gani, ang pasistang kabangis niini ang nagpahait sa determinasyon sa katawhan, diin dili na ikalimod ang pagkamatarunganon ug panginahanglan sa paglunsad og armadong rebolusyon.
Dili matarog ang determinasyon sa New Peoples Army nga ipatuman ang rebolusyonaryong hustisya sa tanang biktima sa masaker sa Toboso.
Ang iwag sa gubat sa katawhan modilaab ug mokaylap sa tibuok nasod, samtang ang pangandoy sa katawhan alang sa nasudnong kagawasan ug tinuod nga demokrasya kusog nga nagdilaab sa ilang mga kasingkasing.
