Pinakamaalab na rebolusyonaryong pagbati ang ipinararating ng pamunuan at buong kasapian ng Partido Komunista ng Pilipinas (PKP) sa Katipunan ng mga Gurong Makabayan (Kaguma). Nakikiisa kami sa inyong matagumpay na pagdaraos kamakailan ng ika-4 na Kongreso ng Kaguma na may temang “Sulong rebolusyonaryong kilusang guro: Magwasto! Magpalawak! Makibaka! Magtagumpay!”
Hindi mapasusubaliang makasaysayan ang inyong Kongreso, hindi lamang dahil naidaos ito matapos ang mahabang panahon, kundi dahil tiyak na bungad ito ng bagong panahon ng pagsulong sa mas mataas na antas ng rebolusyonaryong kilusang guro. Ang binuo ninyong pagkakaisa sa inyong Kongreso ay lalaganap, magbibigay inspirasyon at magbubuklod sa libu-libo pang mga guro sa buong bansa.
Binabati namin ang Kaguma sa makabuluhang nakamit ninyo sa inyong kongreso. Binuo ninyo ang inyong komprehensibong ulat na naglagom sa mahigit dalawang dekada ng inyong gawain mula noong huli ninyong kongreso. Kahanga-hanga ang ulat na ito sa pagsusuring kritikal-sa-sarili, na tinukoy ang mga kahinaan at kakulangan na naging sagabal sa pagsulong ng Kaguma at sa pagtupad nito ng mga rebolusyonaryong tungkulin.
Tinukoy sa ulat na ito sa kongreso ang kabiguan na tuluy-tuloy na itayo at patatagin ang Kaguma at gayo’y kahinaang pukawin ang masang kaguruan sa mga rebolusyonaryong panawagan. Bunga nito ay lumakas ang tangay ng legalismo at repormismo sa loob ng kilusang guro. Bagaman naging masigla sa pagsusulong ng mga pakikibaka ng sektor sa mga nagdaang taon, hindi ito mahigpit na naiugnay sa mas masaklaw na mga usaping panlipunan at sa panawagan para sa rebolusyonaryong pagbabago. Lumiit ang bilang ng mga rebolusyonaryong aktibista na tumayo mula sa kilusang guro, at humina ang pagsuporta nito para sa armadong pakikibaka.
Sa pamamagitan ng pagkilala at paghalaw ng mga aral mula sa mga kahinaang ito, tiyak na maitutuon na ng Kaguma ang kanyang mga pagsisikap na lutasin ang mga kahinaang ito at muling palakasin ang paglahok at pag-ambag ng malawak na hanay ng mga guro sa demokratikong rebolusyong bayan.
Binabati namin ang bagong halal na mga upisyal ng Kaguma. Nakaatang sa inyong balikat ang mabigat na pananagutang pamunuan ang Kaguma sa bagong kabanata nito ng paglawak at pagsulong. Nasa inyo ang hamon na maging huwaran ng determinasyon, pagkamapagkumbaba at kahandaan sa personal na sakripisyo. Tiyak namin na sa pamamagitan ng inyong kolektibong pamumuno, buong-husay ninyong maipatutupad ang inyong papel bilang mga bagong lider ng rebolusyonaryong kilusang guro.
Malinaw na inilalatag ng binuo ninyong plano ang mahahalagang tungkulin ng Kaguma para sa darating na tatlong taon. Sinasalamin ng inyong plano ang determinasyon ng Kaguma na isagawa ang malawakang kilusang propaganda, edukasyon at kultura sa hanay ng mga guro, upang pukawin, organisahin at pakilusin sila sa rebolusyonaryong landas.
Napakahalaga ng papel ng Kaguma sa pagsulong ng pambansa-demokratikong kilusan, laluna ngayon sa gitna ng patuloy na pagkasadlak sa krisis ng atrasadong sistemang malakolonyal at malapyudal. Lalong lumalala ang komersyalisado, kolonyal at mapaniil na sistemang pang-edukasyon.
Ang nabubunyag na malalang korapsyon at pandarambong ng mga burukrata-kapitalista ay lalo pang nagpapatingkad sa ginagawang pagpapabaya ng reaksyunaryong estado sa edukasyon, na ipinakikita ng mababang sahod ng mga guro, bulok na mga pasilidad, mataas na gastusin ng mga mag-aaral at iba pa. Lalo nitong ginagatungan ang galit ng mga guro at pinalalakas pa ang kanilang pasya na lumaban. Sa paglaban ng mga guro para ipagtanggol ang kanilang kapakanan, nasa gulugod at unahang hanay ang mga kasapi ng Kaguma na nagpapamalas ng katatagan at militansya sa pakikibaka.
Nagsisilbing sinag ang Kaguma para sa mga guro. Binibigyan ninyo ng liwanag ang landas na dapat nilang bagtasin para makamit ang hangarin nila at ng buong bayan. Sa inyong pagpupunyagi, binibigyan ninyo ng inspirasyon ang mga guro para tumanaw lagpas sa kasalukuyang mga kahirapan, at makiisa sa pakikibaka ng mas malawak na sambayanan para ganap na baguhin ang kaayusang panlipunan. Dapat mahigpit na makiisa ang mga guro sa masang manggagawa at magsasaka upang bigyang-hugis ang kanilang likas na kapangaryihan na baguhin ang takbo ng kasaysayan at ihulma ang bagong sistemang tunay na malaya at demokratiko.
Sa inyong pagsisikhay, natitiyak namin ilang ulit na tatayog ang prestihiyo ng Kaguma sa mga darating na taon, at sa pamamagitan ninyo, libu-libong mga guro ang aanib sa landas ng rebolusyonaryong pakikibaka.
