‎Ginpanginbulahan sang Armando Sumayang Jr Command-New People’s Army (ASJC-NPA) ang mga intel aset sa idalom sang 15th IB nga nagsungka sa isa ka yunit sang NPA sa banwa sang Cauayan, Negros Occidental, sa sini nga bulan.
‎
‎Suno sa isa ka pahayag nga ginpagwa sang ASJC-NPA, “nagpalapit sa isa ka NPA yunit ang mga intel kag boluntaryo nga nag-ako sa ila papel bilang mga aset sa militar sa lugar, nga gintahasan nga maniktik sa hulag sang Pulang Hukbo kag bisan sa pumuluyo sa ila palibot.”
‎
‎Ginbaton sang NPA ang ila pagsungka sa basehan nga wala pa sila sang halit kag utang nga dugo sa rebolusyonaryong kahublagan.
‎
‎Gidugang ni Ka Andrea Guerrero, tagpamaba sang ASJC-NPA, nga “bukas pa ang pwertahan sa kahublagan sa mga boluntaryo nga magsungka nga mga intel nga wala pa sang halit. Pareho sa ila upod, ginagarantiya sang NPA nga wala sang matabo sa ila kag sa kabaylo ginasaludohan pa, sa ila katampad kag pagreyalisa sa pagpanginto kag kagarok sang 15th IB sang AFP kag NTF-Elcac nga amo ang matuod nga teroristang nagatuga sang kagamo sa mga komunidad.”
‎
Ang pagsurender‎ sang mga intel aset sang militar epekto sang asud-asud nga taktikal nga opensiba kag pagpatuman sang rebolusyonaryong hustisya sa mga masupog nga intel asset sang militar, hambal ni Guerrero.
‎
‎”Sa tuod lang, indi makaprotekta ang AFP, PNP, kag NTF-Elcac sa ila na-into nga mga personaheng ginhimo nga aset. Indi pa nila ini pagaangkunon, kag dal-on lang sang kwarta o temporaryong kahilwayan. Indi ini makasulbad sa pinakasandigan nga problema sang pumuluyo sa kapigaduhon kag kakulangan sa duta kag trabaho,” gindugang ni Guerrero.
‎
‎Sa ulihi nga bahin sa pahayag, gina-enggangyo ni Guerrero ang iban pa nga intel aset nga mangita sang paagi nga mag-angot sa lapit sa ila nga mga yunit sang NPA kag magsungka samtang wala pa sila halit, kag ginpaandaman ang mga may utang nga dugo nga magapadayon ang mga taktikal nga opensiba sang NPA para manukot sang hustisya para sa mga biktima sang pasismo sang reaksyunaryong estado, sa dalan sang demokratikong rebolusyon sang banwa nga may sosyalistang perspektiba.