Niining bulan sa Agosto, nagsige na og suroy ang mga pasistang 62nd IB sa mga bukirang bahin sa Central Negros. Pirmi kini nga naniid sa mga lumulupyo nga gidudahang may kalambigitan sa NPA, nagpangsaka-saka sa mga kabalayan ug gipangpig-otan ang lumulupyo pinaagi sa pagpang- interogar kanila.
Agosto 23—gipusil sa mga pasistang sundalo si Benjie Ferolino, samtang namasaw kini sa iyang baboy sa Sityo Gusa, Barangay Budlasan, Canlaon City, Negros Oriental pasado alas 3:00 sa hapon. Nakadagan ang biktima apan gipusil pa siya sa nasambit nga militar. Nakaangkon og angol sa kalawasan si Ferolino tungod sa maong hitabo.
Agosto 24—Giadtoan sa tropa militar kuyog ang mga traydor sa rebolusyon ang balay sa pamilyang Nilles sa Sityo Calambia, Barangay Trinidad, Negros Oriental. Gi-interogar sila ug gipasanginlan ang usa sa ilang pamilya nga si Louie Nilles nga may kalambigitan sa rebolusyonaryong kalihukan. Gihimakak kini sa biktima tungod nanginabuhi lang siya nga malinawon ug nagtabang sa kawad-on sa ilang pamilya.
Dugang pa, gipatawag ug gipaadto ang nasambit nga pamilya pagka-ugma, Agosto 25, sa detatsment sa McKinley, Guihulngan City kay kuno makig- estorya ang labaw sa 62nd IB.
Samtang, hangtod karon, padayon pa gihapon nga nagkatag nga daw murag irong gutom ang mga pwersa sa 62nd IB.
Kagahapon, Agosto 27—nakita ang presensya sa mga pasistang sundalo sa mga sityo sa Tagbak, Panagtugas ug Bungaw, sakop gihapon sa Barangay Trinidad, sa nasambit nga syudad.
Niining panahona sab, may nakita nga mga sundalo sa Sityo Uyangan, Barangay Budlasan ug sa proper sa Barangay Bucalan, Canlaon City, Negros Oriental.
Ini nga mga insidente nga gihimo sa 62nd IB mimugna og kahadlok sa mga lumulupyo.
Ang pagpanglapas sa 62nd IB sa tawhanong katungod sa katawhan sama sa ilang gihimo sa pamilyang Ferolino ug Nilles nagpakita nga desperado sila nga pukanon ang rebolusyonaryong kalihukan apan ang kamatuoran, nagdugang pa hinuon kini nga nagkalig-on ug magtukmod kini sa katawhan nga mangisog ug mubarog para sa ilang katungod ug mosalmot sa armadong pakigbisog.
Manlimbasog ug mobarog alang sa tinuod nga kagawasan!
Pasistang 62nd IB, layas sa kabukiran!
