Liwat naton nga dumdumon kag buhion sa aton mga rebolusyonaryong balatyagon kag tagipusuon ang mga ginbilin nga legasiya sang aton mga pinalangga nga Onse ka Martir kag Baganihan sang Agosto sa isla sang Panay. Ihalad naton ang pinakamataas nga pagpasidungog kag pula nga pagsaludar sa ila pagka-isganan nga bitbit ang armas asta sa ulihi nga ginutlo sang ila nga ginhawa.
Ang Komite sang Partido sa Sentral nga Prente sang Rehiyon Panay, upod sa mga pumuluyo kag masa sa rehiyon, upod sa mga kaabyanan, pamilya kag mga pinalangga sa kabuhi hugot nga nagapaabot sang pinakamataas nga pagsaludo kag pagdayaw sa mga maisog nga pulang hukbo sang banwa bilang pagdumdom sa ginakabig sa isla nga Onse ka Martir sang Agosto. Pagkatapos sang isa ka tuig nagapabilin nga preska pa sa aton panumduman ang mga makasiligni nga hitabu sang ila pagkabaganihan. Ang onse ka mga martir amo sanday Vicente “Ka Hadji/LJ” Hinojales, Ma. Conception “Ka Concha” Araneta-Bocala, Rewilmar “Ka Mara/Minerva” Torrato, Benjamin “Ka Mamang/Ruby” Cortel, Aurelio “Ka Rio/Zarco” Bosque, Juvelene “Ka Porang/Akay” Silverio, Romulo “Ka Reagan/Pedik” Gangoso, John Paul “Ka Roling/Ronron” Capio, Jerry “Ka Miller” Tacaisan, Armando “Ka Nene/Kulot” Sabares, Jielmor “Ka Tango/Doc” Gauranoc.
Matandaan nga sang nagligad nga tuig, Agosto 5, 2024 ginpangmasaker sang mga berdugo kag teroristang militar sa idalom sang 3rd ID PA ang onse ka mga kaupod sa erya sang Sentral Panay sa lindero sang mga probinsya sang Antique, Aklan kag Iloilo. Ang ini nga hitabu ginatawag naton nga Agosto Martires sang Panay.
Madumduman nga nagligad nga tuig sa pabugal nga ginpahayag sa midya sang terorista nga militar nga ang mga biktima nagkalamatay resulta kuno sang serye sang mga engkwentro nga natabu sa Barangay Aglonok, Calinog kag Barangay Cabatangan, Lambunao pareho sa probinsya sang Iloilo kag Barangay Culyat, Valderama sa Antique.
Sa ulihi nga pagpangusisa, base sa panaysayon sang mga kaupod malapit sa natabuan kag sa pila ka masa, wala sang may natabu nga engkwentro ukon pagbaylohanay sang lupok kundi buhi pa nga nagkaladakpan ang onse ka mga kaupod, ginpangtortyur, gindala sa lain-lain nga lokasyon ukon lugar kag didto na sila amat-amat nga ginpamatay. Kag pagkatapos sini amo ang pagpamomba kag pagpinalupok sang mga militar para pagwaon nga may natabu nga lihitimo nga inaway sa tunga sang mga kaupod kag mga militar.
Ini hayagan nga pagtampalas sa mga internasyonal nga laye may kaangot sa kondukta sa inaway, ilabi sa mga ginakabig nga bihag sa tunga sang gyera ukon mga POW kag sa mga ginakabig hors de combat ukon wala na sa posisyon o ikasarang pa nga magbato. Hayagan man ini nga paglapas sa mga tawhanon nga kinamatarong kag internasyonal nga makatawo nga laye kag sa CARHRIHL nga ginkasugtan sang NDFP kag sang GRP mismo.
Napatay man nila ang onse ka nga Kaupod apang indi nila mapanas ang bulawanon nila nga nangin papel kag kontribusyon sa pagpasulong sang demokratiko nga rebolusyon sang banwa sa Pilipinas. Indi san-o man madula kag mangin abo na lang sa kasaysayan naton kag sa katilingban nga Pilipino ang ila pagkabaganihan. Magapadayon sila nga buhi nga halimbawa kag inspirasyon para sa mga nagapadayon kag sa mga masunod nga linyada sang rebolusyonaryo kag masa. Magaserbe sila nga kalayo sa padayon nga pag-igrab sang rebolusyonaryong armadong paghimakas sa isla sang Panay kag sa bug-os nga pungsod.
Gani ang pinakamatayog naton nga paghanduraw kag pagkilala sa mga Martir kag Baganihan sang Agosto amo ang pagpalig-on sa aton panindugan sa rebolusyon. Ang aton pagpadayon sa kawsa nga ila ginhalaran sang bulawanon nga kabuhi ang pinakakongkreto nga dagway sang paghatag naton sang rebolusyonaryong hustisya. Ang aton pagpursiger sa malawigan nga inaway banwa kag paghakos sa syensya sang gerilyang pakig-away, ini ang paghatag naton sang katumanan sa ila mga handum.
Nadula man sila sa aton panulokan apang san-o man indi nila masarangan makawat sa aton mga tagipusuon ang ila mga handuman. Padayon sila nga magapanggamot kag magapadabong bilang abono nga magaserbi nga wala pagkahubas nga ubay sa aton matag-adlaw nga pagkabuhi kag pagtungod sang hilikuton kag tubtob nga sa palaabuton mahilway ang pumuluyo kag bug-os nga pungsod gikan sa malawig nga pagpamigos kag pagpanghimulos.
Ikabuhi ang diwa sang Onse ka Martir kag Baganihan sang Agosto sa Panay!
Mabuhay ang Partido Komunista ng Pilipinas!
Mabuhay ang Bagong Hukbong Bayan!
Mabuhay ang Demokratiko nga Rebolusyon sang Banwa!
