Ginpatuman sang isa ka yunit sang Roselyn Jean Pelle Command-New People’s Army (RJPC-NPA) ang pagsilot kay Junsly Vallente, 52 anyos, isa ka anay katapo sang bandidong Revolutionary Proletarian Army (RPA), kagaina, Hulyo 11, alas 5:50 sang aga sa Sityo Harvey, Barangay Minapasok, Calatrava, Negros Occidental.
Isa siya sa nanguna sa pagpang-istraping sa isa ka camp-out sang mga naghimakas nga mga mangunguma sa duta sadtong 2012 sa Sityo Minauyahan, Barangay Minautok, sa amo nga banwa nga nagresulta sang pagkapilas sang mga nagapartisipar sang amo nga camp-out kag pagkapatay sa pito ka mga karabaw.
Responsable man si Vallente sa nagkalain-lain nga insidente sa pagpanghalit sa pumuluyo nga nagtuga sa pagkapatay sa 18 ka mga karabaw sa lugar nga nakadislokar sa ila pangabuhian.
May kaso man siya sa pagpatay sa isa ka pumuluyo sa Cadiz City, Negros Occidental.
Isa man siya ka lokal nga aset sang #DiMasaligan79IB kag tinawo siya sa warlord nga si Baby Lumayno nga nagpalayas sa mga mangunguma sa lugar.
Madumduman nga si Lumayno gin-ambush sang mga Pulang hangaway sa Barangay Minapasok sadtong 2017 kag nakuhaan sang matag-as nga kalibre sang armas.
Narekober kay Vallente ang isa ka .45 cal pistol, lima ka magasin kag mga bala.
