Gidumdum sa Communist Party of India (CPI) Maoist ang ika-24 nga anibersaryo sa People’s Liberation Guerilla Army (PLGA) pinaagi sa usa ka semana nga pagselebrar gikan Disyembre 2 hangtud Disyembre 8. Panawagan sa pagsaulog ang pagpalapad sa baseng masa, pagpadaghan sa rebolusyonaryong pwersa, ug pagpreserba ug pagpalambo sa Partido, PLGA, ug sa rebolusyonaryong nagkahiusang prente. Giawhag sa Partido ang pagpakusog sa pagsukol sa “Kagaar,” usa ka kontra-rebolusyonaryong gubat, nga gipatuman sa sentral nga estado sa India batok sa katawhang Indian ug Adivasi.
Gipangunahan sa Komisyon Militar sa CPI (Maoist) ang pag-ases sa mga nahimo sa PLGA sulod sa usa ka tuig nga pag-asdang sa rebolusyonaryong gubat niadtong Oktubre. Giila niini ang mga pag-atras tungod sa internal nga mga kahuyangan ug limitasyon, ingonman tungod sa grabeng atake sa kaaway. Gibalikan usab niini ang mga kalampusan ug pagtulun-an gikan sa mga mahinungdanong desisyon nga gipatuman sa Partido sukad 2019 nga nagbunga og pagbwelo sa armadong pakigbisog sa misunod nga mga tuig (2020-2022).
Dungan niini, giila sa CPI (Maoist) ang positibong mga kasinatian sa gerilyang pakiggubat ug malampusong pag-organisa sa katawhan alang sa anti-imperyalista, anti-burgesya kumprador, anti-pyudal ug anti-militarisasyong pakigbisog.
Usa dinhi ang pagpanulong sa giusang mga pwersa sa PLGA gikan sa lain-laing yunit ngadto sa kampo sa pulis sa South Bastar sa Dandakaranya niadtong Enero 16. Sa maong reyd, gipalibutan sa mga gerilya ang kampo nga adunay 500 ka paramilitar ug espesyal nga pwersang kumando, ug gipaulanan kini og kapin 1,000 ka granada gikan sa mga spigot grenade launcher ug gatusan ka bala. Kapin 35 ka pulis ug kumando ang napatay samtang 40 ang nasamdan.
Gipadayon sa mga yunit sa PLGA ang paglunsad og mga taktikal nga opensiba subay sa panawagan sa Partido alang sa usa ka kontra-opensibong kampanya gikan Marso hangtud Hunyo.
Nagresulta kini sa dili moubos sa 100 ka aksyon gerilya sulod sa unang 10 ka bulan ning tuig. Sa maong panahon, 64 kaaway ang napatay ug 120 ang nasamdan.
Bisan pa man, mas ubos kini kumpara sa miaging mga tuig, sumala pa sa CPI (Maoist). Dili igo ang mga paningkamot aron mapatigbabawan ang kadaut nga nahiaguman sa mga atake sa kaaway. Sulod lang sa 10 ka bulan, mikabat sa 254 ka manggugubat sa PLGA ang namartir. Kini tungod kay nagpadayon gihapon ang daan nga mga praktika ug kahuyangan nga itago ang lihok ug pamaagi sa hukbong gerilya, matud pa sa Partido.
Aron masolusyunan kini, gimandoan sa Partido ang PLGA nga siguruhon ang pagpreserba sa suhetibong mga pwersa ug likayan ang mga kadaut. Matud niini, kinahanglan bag-ohon ang pamaagi sa pagkampo, pagbalhin, pagkuha og armas, pag-organisar og miting ug pagtuon, pagbansay militar, ug paggamit og elektronikong gadyet. Kinahanglan usab bungkagon ang mga kutay sa mga impormer, espiya, “nagbalik-loob,” ug double agent nga natanum sa kaaway sa mga komunidad ug nyutralisahon ang ilang epekto.
Sa banabana sa Partido, mikabat na sa 800,000 ka tropang pulis, paramilitar, kumando, air force ug espesyal nga pwersa ang gibubu sa reaksyunaryong estadong Indian alang sa kampanyang Kagaar. Gisakop ug giokupa nila ang mga gidudahang mga rebolusyonaryong base lakip na ang mga lasang. Ang maong mga lugar target sa lokal ug langyawng korporasyon aron tukuran og mga dam, plantang pang-enerhiya ug minahan.
Atubangan niini, giduso sa Partido ang panginahanglang palambuon ang PLGA aron mas epektibo kining makalunsad og gerilyang pakiggubat.
Dugang niini, kinahanglan tukuron ang usa ka lapad nga kalihukan aron pugngan ang kontra-rebolusyonaryong pang-atake sa katawhan. Kinahanglang batukan ang plano sa nagharing paksyong Hindutva, nga girepresentahan sa rehimeng Modi, nga tukuron ang usa ka “estadong Hindu nga ginapadagan isip korporasyon.” Ilalum sa maong iskema, tanang lasang ug bisan kapatagan sa nasud itanyag ngadto mga lokal ug langyawng kumpanya sa agrikultura, mina, plantang pang-enerhiya ug uban pa sa kadaut sa katawhang Indian ug Adivasi.
